დეზინფორმაცია: ვიდეოში სირიის მთავრობის მიერ ქრისტიანის დახვრეტა ჩანს
სოციალურ ქსელში Facebook-ანგარიშები ვიდეოს ავრცელებენ (1, 2) (დაარქივებული ბმული), რომელშიც, მათი მტკიცებით, სირიაში „მთავრობაში მოსული ტერორისტების მიერ ჯვარზე გაკრული ქრისტიანის დახვრეტაა“ ნაჩვენები. რეალურად, აღნიშნული ვიდეო 2015 წელსაა გადაღებული და მასზე ისლამის არმიის მიერ „უმას არმიის“ ლიდერის, აბუ ალი ხაბიას მკვლელობა ჩანს.
ვიდეოსთან დაკავშირებული დეტალების დასადგენად, „ჯეოფაქტსი“ „არაბული ფაქტების გადამმოწმებელ ქსელს“ დაუკავშირდა. საგულისხმოა, რომ გავრცელებულ ვიდეოზე ზემოთ ნაწილში, ნაცრისფერ ფონზე „Army of Islam-ის ლოგოა დატანილი. ქვედა ნაწილში ბანერზე კი იკითხება წარწერა: „აბუ ალი ხაბია“.
ვიდეო 2015 წლის 1 სექტემბრით თარიღდება, როცა სირიაში, რიფ დიმაშქის პროვინციაში „ისლამის არმიის“ წევრმა „უმას არმიის“ ლიდერი აბუ ალი ხაბია მოკლა. მის მკვლელობას წინ უსწრებდა „ისლამის არმიის“ სამხედრო კამპანია „უმას არმიის“ დასაშლელად, ასადის რეჟიმთან თანამშრომლობისა და აღმოსავლეთ ღუტაში ნარკოტრაფიკში მონაწილეობის ბრალდებების მოტივით. „ისლამის არმიის“ მიხედვით მისი მკვლელობის მიზეზად დამასკოში ბრძოლაში მონაწილეობა დასახელდა, როცა ხაბიამ მხარდამჭერებთან ერთად ისლამის არმიის მიერ დაწესებული “წითელი ხაზები” გადაკვეთა.
ცნობისთვის, გასული წლის ბოლოს სირიაში ასადის რეჟიმი დაემხო და აჰმედ ალ-შარას ხელმძღვანელობით ხელისუფლებაში ისლამისტური გარდამავალი მთავრობა მოვიდა, 2025 წლის მარტში ალ-შარას ხელისუფლებას დაქვემდებარებულ უსაფრთხოების ძალებსა და ასადის მომხრეებს შორის ყველაზე სისხლიანი და ძალადობრივი დაპირისპირება დაიწყო. დაპირისპირება დასავლეთ სირიაში მდებარე ქალაქებში – ლატაკიასა და ტარტუსში დაიწყო. დასავლეთ სირიაში მდებარე ეს სანაპირო რეგიონი ალავიტი უმცირესობით მჭიდრო დასახლებულ ადგილს წარმოადგენს. აღსანიშნავია, რომ ბაშარ ალ-ასადი, ისევე როგორც მისი მამა, სწორედ ალავიტებს მიეკუთვნებოდნენ და ეს დასახლებები მისი ძალაუფლების მხარდამჭერ კერას წარმოადგენდა.
ასადისა და სირიის ამჟამინდელ მთავრობის მიმართ ლოიალურად განწყობილ ძალებს შორის დაწყებული შეტაკებები მალევე გადაიზარდა კომუნალურ და შურისძიების მკვლელობებში, რასაც რამდენიმე ასეული მშვიდობიანი მოქალაქის დაღუპვა მოჰყვასირიის ადამიანის უფლებათა ობსერვატორიის 9 მარტის განცხადების მიხედვით, მათ მასობრივი ხოცვის 39 შემთხვევაში და სხვა ინდივიდუალური სიკვდილით დასჯის შემთხვევებში 973 მშვიდობიანი მოქალაქის სიკვდილი დააფიქსირეს, რომლებიც მათი თქმით, სირიის სანაპირო ზოლსა და ლატაკიის მთებში სამხედრო და უსაფრთხოების ძალებმა ჩაიდინეს. სირიის ადამიანის უფლებათა ობსერვატორიის მიხედვით, დაღუპულთა რიცხვი 1400-ზე მეტია, თუ ამ სტატისტიკაში, მშვიდობიანი მოქალაქეების გარდა, შეტაკებების შედეგად დაღუპულ 231 უსაფრთხოებისა და თავდაცვის სამსახურის წარმომადგენელსა და 250 ალავიტ მებრძოლსაც განვიხილავთ (ვრცლად იხილეთ „ჯეოფაქტსის“ სტატია).
