სოციალურ ქსელში ამერიკელი გენერლის ყალბი ციტატა ვრცელდება
სოციალურ ქსელში Facebook-მომხმარებელი ნონა შარაბიძე, რომლის მიერ გავრცელებული დეზინფორმაცია „ჯეოფაქტსს” არაერთხელ გადაუმოწმებია (1; 2; 3), შემდეგ ინფორმაციას აქვეყნებს: „ამერიკელი გენერალი უკრაინელებს: «თქვენ ლამაზად კვდებით, ჩვენ ასე ვერასდროს გავაკეთებდით“.
პოსტში მითითებული არ არის, თუ ვის ეკუთვნის ციტატა. თუმცა თანდართულია პიროვნების ფოტოსურათი. ფოტოს ძიების ინსტრუმენტის (Reverse image search) გამოყენებით ფოტოზე მყოფი პიროვნების იდენტიფიცირება შევძელით – მასზე გენერალი დევიდ პეტრეუსია გამოსახული.
საგულისხმოა, რომ მსგავსი ციტატა სანდო მედიასაშუალებების ვებგვერდებზე არ იძებნება.
ინტერნეტსივრცეში იდენტური ციტატა მხოლოდ რუსულმა არასანდო მედიასაშუალებებმა გაავრცელეს. (1; 2) ერთ-ერთ სტატიაში მტკიცებულების სახით მოყვანილი იყო ვიდეო, სადაც თითქოს გენერალი ამ მტკიცებას აჟღერებდა. ვიდეო კიევის უსაფრთხოების ფორუმზე 2025 წლის 21 თებერვალსაა გადაღებული, სადაც დევიდ პეტრეუსი დისკუსიაში იღებდა მონაწილეობას.
პეტრეუსმა კონფერენციაზე აღნიშნა, რომ უკრაინა მოწინავე ტექნოლოგიებს ავითარებს, რომლებიც მსოფლიოში არსად გამოიყენება. ისინი ეხმარებიან რუსული შეტევების შეჩერებაში ფრონტზე. მისი თქმით, „ომის ტრანსფორმაციას უკრაინა ხელმძღვანელობს“. ამავე დროს, რუსები იმეორებენ უკრაინის პროგრესს. „მათ ძალიან კარგად იციან რადიოელექტრონული ბრძოლა, ჩახშობა, საჰაერო თავდაცვა და ა.შ. მაგრამ უკრაინა განაგრძობს მოწინავე ტექნოლოგიების განვითარებას, რომლებიც მსოფლიოში არსად გამოიყენება, და ეს არის ომის მომავალი“, – განაცხადა პეტრეუსმა. როგორც უკრაინული მედია, NV.ua წერს, პეტრეუსი დარწმუნებულია, რომ უკრაინა გააგრძელებს უწყვეტ პროგრესს დრონების მიმართულებით, რომლებიც რუსეთის სამხედრო ძალების ცოცხალი ძალისა და ტექნიკის გასანადგურებლად გამოიყენება. ამჟამად, რუსეთი ვერც კი იყენებს თავის ტანკებს შეხების ხაზთან ახლოს, რადგან ისინი უკრაინული დრონების მიერ სწრაფად ნადგურდებიან.
ამგვარად, გავრცელებული ციტატა ყალბია.
