სოციალურ ქსელში ზვიად გამსახურდიას გაყალბებული თარგმანი ისევ ვრცელდება
Facebook-სა (1, 2, 3) და TikTok-ზე ვრცელდება ზვიად გამსახურდიას ვიდეო, რომელშიც ის თითქოს ამერიკის საწინააღმდეგო განცხადებას აკეთებს. „დადგება დრო, როდესაც ამერიკის იმპერია გადაწყვეტს საქართველო ბოლომდე დაიმორჩილოს. ისინი ეცდებიან გარყვნან, გაანადგურონ ჩვენი სარწმუნოება და ტრადიციები. ამ ყველაფრის ისინი მოახერხებენ არასამთავრობო სექტორის დახმარებით. ჩვენ უარი უნდა ვუთხრათ როგორც რუსულ, ასევე ამერიკულ ბოროტებას. ჩვენი ეროვნული ვალია დავდეთ მედგრად, პასუხი გავცეთ ამ იმპერიულ ძალებს და შევინარჩუნოთ თვითმყოფადობა. ქართველი ერი არის უზენაესი უზენაესთა შორის. დიდება საქართველოს“, – ისმის ვიდეოში, რომელზეც დართულია აღწერა: „ჯერ კიდევ როდის თქვა ზვიადმა“. ვიდეოს კადრები 1991 წლის ტელეხიდ „მოსკოვი-თბილისის“ ჩანაწერიდან არის აღებული, სადაც ზვიად გამსახურდია რუსულ ენაზე სრულიად სხვა საკითხებზე საუბრობს. ქართული თარგმანი, რომელიც ორიგინალი ვიდეოს აუდიოს გადაადეს, ყალბია. იგივე ტელეხიდიდან ზვიად გამსახურდიას განცხადებების გაყალბებული თარგმანები „ჯეოფაქტსს“ აქამდეც გადაუმოწმებია.
გავრცელებული ვიდეოს პირველ რამდენიმე წამზე ისმის ზვიად გამსახურდიას ხმა, სადაც ის ამბობს სიტყვებს – „Запад пока не решил“, შემდეგ კი მისი ხმა გადაფარულია. ამ კადრის ხილვა, რომელიც ტელეხიდ „მოსკოვი-თბილისის“ ჩანაწერიდან არის აღებული, ორიგინალ ჩანაწერში 39:26 წუთზე არის შესაძლებელი, რა დროსაც ზვიად გამსახურდია კითხვაზე საპასუხოდ, თუ რატომ იკავებს თავს დასავლეთი საქართველოს აღიარებისგან, პასუხობს, რომ დასავლეთს არ გადაუწყვეტია, თუ როგორი ურთიერთობები ექნება არამხოლოდ საქართველოსთან, არამედ მთლიანად ყოფილ საბჭოთა კავშირის რესპუბლიკებთან. კერძოდ, ზვიად გამსახურდია ამბობს:
რუსულად: „Запад Пока не решил. Дело не в Грузии, дело не в государственном устройстве или в личностях. Запад Пока не решил как ему быть с республиками бывшего Советского Союза. Вот вся суть в этом. Он не решил свою политику, он пока не выработал и по-моему идёт интенсивное обсуждение всего этого, как я знаю, и наверное, судьба Грузии решится вместе с судьбами других республик. Вот я так считаю.“
ქართულად: „დასავლეთმა ჯერ კიდევ ვერ გადაწყვიტა. საქმე საქართველოში, სახელმწიფო მოწყობაში ან პიროვნებებში არ არის. დასავლეთმა ჯერ ვერ გადაწყვიტა, როგორ მოიქცეს ყოფილი საბჭოთა კავშირის რესპუბლიკებთან მიმართებით. მთელი არსი ამაში მდგომარეობს. მან ჯერ ვერ გადაწყვიტა თავისი პოლიტიკა, მიმდინარეობს ამ ყველაფრის ინტენსიური განხილვა, როგორც მე ვიცი, და სავარაუდოდ, საქართველოს ბედი სხვა რესპუბლიკების ბედთან ერთად გადაწყდება. აი, მე ასე ვფიქრობ“.
აქედან გამომდინარე, ორიგინალ ვიდეოში ზვიად გამსახურდია არაფერს ამბობს ამერიკის მხრიდან არასამთავრობო სექტორის დახმარებით ქართული სარწმუნოების და ტრადიციების განადგურების შესახებ. მსგავსი შინაარსის განცხადებას გამსახურდია მთლიანი ტელეხიდის განმავლობაშიც არ აკეთებს. მსგავსი ციტატა არც ღია წყაროებში იძებნება.
