სოციალურ ქსელში პოლიტიკოს გუბაზ სანიკიძესთან დაკავშირებით ყალბი ამბავი ვრცელდება
სოციალურ ქსელში Facebook-მომხმარებელი აქვეყნებს ფოტო-ანაბეჭდს (დაარქივებული ბმული), რომელშიც თითქოს პოლიტიკოს გუბაზ სანიკიძის სახელით შექმნილ Facebook-ანგარიშს უდევს ფოტო, რომ Glovo-ს კურიერმა მის შეკვეთას გუბაზის ნაცვლად „გუ*ოზი“ დააწერა. ამის საპასუხოდ კი გუბაზ სანიკიძის სახელით შექმნილი ანგარიში წერს: „გლოვოს მალე გლოვის დღეს მოვუწყობ! ჩემი შეკვეთა „ქოცმა“ კურიერმა მოიტანა და ასეთი უმსგავსობა დააწერა ზედ. ყველას, ყველას გვაქვს ჩვენი წითელი ხაზები და ამას აღარ შეგარჩენთ! პასუხს აგებთ თითოეულ ასოზე“. რეალურად, გავრცელებულ ფოტოანაბეჭდზე ანგარიში გუბაზ სანიკიძეს არ ეკუთვნის და „გლოვოსთან“ ინციდენტიც არ დასტურდება.
აღსანიშნავია, რომ პირველად იდენტური ინფორმაცია 2020 წელს გავრცელდა და მას ფაქტების გადამმოწმებელი ორგანიზაცია „ფაქტ-მეტრი“ გამოეხმაურა. მაშინაც პოსტი ფოტოანაბეჭდის სახით გავრცელდა, რომელსაც თითქოს პოლიტიკოსი გუბაზ სანიკიძე სოციალურ ქსელში აქვეყნებდა. როგორც „ფაქტ-მეტრი“ წერს, გუბაზ სანიკიძის სახელით შექმნილი Facebook-ანგარიში, სავარაუდოდ, სწორედ ამ ფოტოს გასავრცელებლად შეიქმნა. დამატებით, „ფაქტ-მეტრთან“ საუბარში 2020 წელს გუბაზ სანიკიძემ განაცხადა, რომ მას სოციალურ ქსელ Facebook-ზე ანგარიში არ აქვს და არც „გლოვოსთან“ მსგავსი ინციდენტი დაადასტურა.
Facebook- ანგარიში სახელად „გუბაზ სანიკიძე“, რომელიც ფოტოანაბეჭდზეა ნაჩვენები, ამჟამად ხელმისაწვდომია არაა. დამატებით, Facebook-ზე რამდენიმე ანგარიში იძებნება გუბაზ სანიკიძის სახელით (ბმული 1, ბმული 2, ბმული 3, ბმული 4). აქედან, ერთ ანგარიშზე პროფილის ფოტოს მიღმა არც ერთი პოსტია გამოქვეყნებული. დანარჩენ სამ ანგარიშს ათასზე მეტი მეგობარი უფიქსირდება. აქედან ორზე (ბმული 1, ბმული 2), პოსტების უმრავლესობა სხვის მიერ მონიშნული (tagged) პოსტებია. მესამე ანგარიში კი, სავარაუდოდ, პოლიტიკოსის გასაშარჟებლად შექმნილი ანგარიშია.
დამატებით, „ჯეოფაქტსი“ გუბაზ სანიკიძეს დაუკავშირდა და პოლიტიკოსმა სატელეფონო საუბრისას განაცხადა, რომ არც „გლოვოს“ კურიერთან მოსვლია კონფლიქტი არასდროს და, ზოგადად, არც Facebook-ანგარიში აქვს. მისი თქმით, სოციალურ ქსელებს არ იყენებს და პირადი ანგარიშები არც ერთ პლატფორმაზე არ გააჩნია.
ამდენად, პოლიტიკოს გუბაზ სანიკიძეს სოციალურ ქსელში ანგარიში არ აქვს და ფოტოანაბეჭდზე არსებული ამბის ნამდვილობაც არ დასტურდება.
