არ დასტურდება, რომ ზურაბ ჯაფარიძე თურქეთის სასაზღვრო სტრუქტურებმა ინტერპოლის ძებნის გამო დააკავეს
მოკლედ საკითხავი
ქართულ ფეისბუქ სივრცეში გავრცელებული პოსტის ავტორის მტკიცებით, ზურაბ ჯაფარიძე თურქეთის აეროპორტში ინტერპოლის ძებნის გამო დააკავეს.
ღია წყაროების, მათ შორის ინტერპოლის ბაზების ანალიზის შედეგად მტკიცება არ დასტურდება.
ქართულ ფეისბუქ სივრცეში გავრცელდა პოსტი, რომლის ავტორიც ამტკიცებს, რომ ქართველი პოლიტიკოსი ზურაბ გირჩი ჯაფარიძე თურქეთის აეროპორტში იმის გამო დააკავეს, რომ ის ინტერპოლის მიერ იყო ძებნილი (დაარქივებული ბმული). პოსტში ასევე ნათქვამია, რომ ინტერპოლის მიერ ჯაფარიძის ძებნა ქართველი სამართალდამცავების მიმართვის საფუძველზე დაიწყო.
2026 წლის 14 ოქტომბერს ქართულ მედიაში გავრცელდა ინფორმაცია, რომ ზურაბ ჯაფარიძე თურქეთის ერთ-ერთ აეროპორტში ბრიუსელის მიმართულებით მგზავრობისას დააკავეს. ინფორმაცია თავდაპირველად პოლიტიკურმა გაერთიანება ALDE-მ გაავრცელა, რომლის წევრიცაა ზურაბ ჯაფარიძის პარტია. რამდენიმე საათიანი დაკავების შემდეგ, ჯაფარიძე გაათავისუფლეს და ის საქართველოში დაბრუნდა.
პირველ რიგში უნდა აღინიშნოს, რომ ზურაბ ჯაფარიძე ინტერპოლის მიერ არ იძებნება. ინტერპოლის მიერ წითელი ცირკულარით ძებნილ პირთა მონაცემები საჯაროდაა ხელმისაწვდომი მათ საიტზე, სადაც სხვადასხვა მონაცემების მიხედვით შესაძლებელია პირების ძიება. წითელი ცირკულარი "ჯაფარიძე" გვარის მქონე პირებზე ამ ეტაპისთვის ბაზაში არ იძებნება. წითელი ცირკულარი ინტერპოლის ცირკულარებიდან ერთადერთია, რომელიც ზურაბ ჯაფარიძის სიტუაციას შეიძლება მიესადაგებოდეს.
დამატებით უნდა ითქვას, რომ იმ სისხლის სამართლის საქმის პროკურორმა, რომელიც ამ ეტაპზე ზურაბ ჯაფარიძის წინააღმდეგაა აღძრული, არ დაადასტურა, რომ პროკურატურამ თურქეთის პოლიციას მიმართა ზურაბ ჯაფარიძის შეჩერების ან დაკავების მოთხოვნით. მედიასთან საკითხის კომენტირებისას, პროკურორმა აღნიშნა, რომ იმ შემთხვევაში თუ ჯაფარიძის გაჩერების სურვილი ექნებოდათ, ამას საქართველოს საზღვარზევე გააკეთებდნენ.
თავად ზურაბ ჯაფარიძემ მოგვიანებით სოციალურ ქსელში განმარტა, რომ მისთვის თურქეთის სტრუქტურებისგან გადაცემული განმარტებითი დოკუმენტის მიხედვით, მას 2025 წლის ნოემბრიდან, თურქეთში შესვლა აკრძალული აქვს 5 წლის ვადით. ჯაფარიძის თქმით, ეს ქართული სტრუქტურებიდან მიღებული ინფორმაციის საფუძველზე მიღებული გადაწყვეტილებაა. მან სოციალურ ქსელში გადაცემული დოკუმენტის ფოტოც გამოაქვეყნა (არქივი).
