საქართველოს მთავრობას ირანის მოქალაქეებისთვის სავიზო შეზღუდვა არ დაუწესებია
საქართველოს მთავრობას ირანის მოქალაქეებისთვის სავიზო შეზღუდვა არ დაუწესებია
სოციალურ ქსელში ვრცელდება მტკიცება, თითქოს "საქართველომ ირანის მოქალაქეებისთვის სავიზო რეჟიმი გაამკაცრა" (არქივირებული ბმული).
სინამდვილეში აღნიშნული ინფორმაცია არ დასტურდება. საქართველოს საგარეო საქმეთა სამინისტროს ოფიციალურ გვერდზე 2026 წლის 16 სექტემბრის მონაცემებით არ იძებნება ცნობა, ირანის მოქალაქეებისთვის სავიზო რეჟიმის გამკაცრების შესახებ. Google-ის საძიებო სისტემაში ფრაზის "ირანის მოქალაქეებისთვის სავიზო რეჟიმი" ძებნისას აღნიშნული ინფორმაციის დამადასტურებელი სანდო წყარო არ იძებნება. ძიების შედეგებს შორის სანდო მედიის მიერ გამოქვეყნებული. 2016 წლის ცნობები გვხვდება, რომელშიც ნათქვამია, რომ "ირანის მოქალაქეებისთვის უვიზო რეჟიმი 15 თებერვლიდან აღდგება, რაც იმას ნიშნავს, რომ ორდინალური პასპორტის მფლობელებს საქართველოს ტერიტორიაზე პირველი შესვლის დღიდან, ვიზის გარეშე 45 დღემდე ყოფნის უფლებით სარგებლობა შეეძლებათ, იტყობინება საქართველოს საგარეო საქმეთა სამინისტრო.".
საგარეო საქმეთა სამინისტროს ოფიციალურ საკონსულო გვერდზე ძიებისას (ვებგვერდზე ქვეყნად "ირანის" არჩევის შემთხვევაში, პასპორტის ველში ორდინალური და ვიზიტის ტიპში მოკვლევადიანი), ჩანს, რომ 2016 წელს მიღებული რეჟიმი კვლავ ძალაშია და ირანის მოქალაქეებს, საქართველოში 45 დღით უვიზოდ შემოსვლის და ყოფნის უფლება აქვთ.
შესაძლოა გავრცელებული ინფორმაცია უკავშირდებოდეს საქართველოს გადაწყვეტილებას აღასრულოს აშშ-ის მიერ 8 სექტემბერს გამოცხადებული სანქციები, რომლებიც 27 ირანულ ავიაკომპანიას შეეხო, მათ შორის არიან კომპანიები, რომლებიც საქართველოს მიმართულებით რეისებს ასრულებენ. 10 სექტემბერს საქართველოს სამოქალაქო ავიაციის სააგენტომ განაცხადა, რომ საქართველო "საერთაშორისო სანქციების რეჟიმის სრული დაცვით" იმოქმედებს და უზრუნველყოფს "საერთაშორისო პარტნიორების მიერ დაწესებული სანქციების შესრულებას. ეს ეხება საავიაციო სექტორსაც“.
აღნიშნულ გადაწყვეტილებას საქართველოში ირანის საელჩო გამოეხმაურა (არქივი). საელჩომ შავი ზღვის რეგიონის რუკა გამოაქვეყნა, რომელზეც საქართველოს მხოლოდ დასავლეთი ნაწილი. პოსტში აღნიშნულია: "ბოლო დღეებში, ირანელმა ტუროპერატორებმა საქართველოს მიმართულებით ტურისტული მოგზაურობების გაგრძელებასთან დაკავშირებით ახალი კითხვებით მიმართეს ირანის ისლამური რესპუბლიკის საელჩოს საკონსულო განყოფილებას. ჩვენი პასუხი ნათელია: საქართველო, უდავოდ, შავი ზღვის სანაპიროზე ირანელთა ერთ-ერთი მნიშვნელოვანი ტურისტული მიმართულება იყო — ულამაზესი ქვეყანა, გამორჩეული ბუნებით, მდიდარი კულტურით, მრავალფეროვანი სამზარეულოთი, წყაროებითა და მინერალური წყლებით, რომელიც ბოლო წლების განმავლობაში მრავალ ირანელ ტურისტს მასპინძლობდა.
ჩვენ პატივს ვცემთ საქართველოს, ქართველ ხალხსა და ამ ქვეყნის დამოუკიდებელ არჩევანს. საქართველოს ბოლო გადაწყვეტილება, რომელიც დასავლეთის სანქციებიდან გამომდინარე გარკვეული შეზღუდვების დაწესებას უკავშირდება, არის გადაწყვეტილება, რომელსაც პატივი უნდა ვცეთ, როგორც ამ ქვეყნის არჩევანს. თუმცა სხვების არჩევანის პატივისცემა არ ნიშნავს საკუთარი არჩევანის უფლების უგულებელყოფას."
ამდენად, ირანის საელჩომ სწორედ სანქციებიდან გამომდინარე შეზღუდვებზე ისაუბრა და ირანის მოქალაქეებისთვის სავიზო რეჟიმის გამკაცრებაზე არაფერი აღუნიშნავს.
