კათოლიკე მონაზვნის ცემის საქმეზე შეცდომაში შემყვანი ინფორმაცია ვრცელდება
სოციალურ ქსელ “ფეისბუქში” მოხმარებელი ავრცელებს კათოლიკე მონაზვნის ცემის ვიდეოს. პოსტის აღწერის მიხედვით, თავდამსხმელი ისრაელის სასამართლომ გაამართლა. პოსტში ვკითხულობთ: “ისრაელის სასამართლომ 36 წლის იონა შრაიბერი კათოლიკე მონაზვნის ცემის საქმეზე გაამართლა.
შემთხვევა 28 აპრილს, იერუსალიმის ძველ ქალაქში მოხდა. დაცვის მხარის ვერსიით, ღრმად რელიგიურ იუდეველ შრაიბერს ქალის ქრისტიანულმა სამოსმა დროებით გონება დაუბინდა, რის გამოც სასამართლომ მიიჩნია, რომ მომხდარის დროს იგი საკუთარ ქმედებებზე სრულად პასუხისმგებელი არ იყო და ბრალდებულის სასარგებლოდ მიიღო გადაწყვეტილება.“ (არქივირებული ბმული).
აღნიშნული ფაქტი 2026 წლის 28 აპრილს მოხდა. კათოლიკე მონაზონს ქუჩაში ფეხით გადაადგილებისას მოქალაქე თავს დაესხა. ისრაელის პოლიციამ თავდამსხმელი მალევე დააკავა და ბრალი რელიგიური შეუწყნარებლობის მოტივით ჩადენილი დანაშაულისთვის წარუდგინა. მომხდარს გამოეხმაურა ისრაელის საგარეო საქმეთა სამინისტროც და ის სამარცხვინო აქტად შეაფასა, რომელიც ეწინააღმდეგება ისრაელის ფუძემდებლურ პრინციპს პატივისცემის, თანაარსებობისა და რელიგიური თავისუფლებების შესახებ. “ისრაელი რჩება რელიგიის თავისუფლებისა და რწმენის თავისუფლების დაცვის ერთგულად ყველა რწმენის წარმომადგენლისთვის, რათა იერუსალიმი მომავალშიც იყოს ქალაქი, სადაც ყველა თემის წარმომადგენელს შეუძლია იცხოვროს, ილოცოს და წამდეს უსაფრთხო და ღირსეულ გარემოში,”-ვკითხულობთ განცხადებაში.
საქმეზე საბოლოო გადაწყვეტილება სასამართლომ 24 აგვისტოს გამოიტანა. გადაწყვეტილებაში სასამართლო დაეყრდნო თავდამსხმელის ფსიქიატრულ შეფასებას. ექიმებმა თავდამსხმელ იონა შრაიბერს შიზოფრენიის დიაგნოზი დაუსვეს, რომელსაც ფსიქოზური ეპიზოდები მრავალი წლის განმავლობაში ჰქონდა თუმცა არ ფლობდა ინფორმაციას საკუთარი ჯანმრთელობის მდგომარეობის შესახებ. ექიმის დასკვნის მიხედვით, მის ჯანმრთელობის მდგომარეობას ჰქონდა გავლენა მის ქმედებებზე და, დანაშაულის ჩადენის მომენტში, შრაიბერს ვერ იგებდა რას აკეთებდა და არ შეეძლო აღნიშნულისგან თავის შეკავება.
დიაგნოზის საფუძველზე მოსამართლემ თავდამსხმელს 6 წლამდე ვადით იძულებითი მკურნალობა დაუნიშნა. როგორც სასამართლო განმარტავს, ეს არ ნიშნავს პირის 6 წლის ვადით მოთავსებას სამკურნალო დაწესებულებაში, არამედ მისი გათავისუფლება შესაძლოა მოხდეს ვადაზე ადრე, ექიმების რეკომენდაციის შესაბამისად.
მნიშვნელოვანია აღინიშნოს, რომ კათოლიკე მონაზონზე თავდასხმა ქრისტიანებისა და ქრისტიანული სიწმინდეების წინააღმდეგ მომხდარი გახშირებული თავდასხმების პარალელურად მოხდა და სასამართლოზე ადვოკატი ამაზეც ამახვილებდა ყურადღებას. ადვოკატის ცნობით, თავდასხმის მსხვერპლი არ არის კმაყოფილი ფსიქიატრიული შეფასებით თუმცა პატივს სცემს სასამართლოს გადაწყვეტილებას.
ამდენად, სოციალურ ქსელში გავრცელებული პოსტი მცდარად მიუთითებს, თითქოს ისრაელის სასამართლომ დამნაშავე გაამართლა და თითქოს ქრისტიანი მონაზვნის დანახვაზე, ძლიერი სულიერი აღელვებით, დანაშაულის ჩადენა მისაღებ მოვლენად მიიჩნია.
