სამხედრო ნაცისტური ტატუებით რუსია, არა უკრაინელი
2026 წლის 16 ივლისს, ქართულ Facebook-სივრცეში რუსეთის-უკრაინის ომის დროს ტყვედ ჩავარდნილი სამხედროს სურათი გავრცელდა (არქივირებული ბმული), რომელსაც სხეულზე ნაცისტური სიმბოლოების ტატუები აქვს. ფოტოზე დართული აღწერის მიხედვით, მასზე გამოსახული არის რუსი ჯარისკაცების მიერ ტყვედ აყვანილი უკრაინელი სამხედრო. რეალურად, სურათზე არა უკრაინელი, არამედ რუსი სამხედრო ჩანს.
სურათის ქვემო ნაწილზე დართული არის წარწერა - Vежливые. Zлые. СВОи. აღნიშნული არის უკრაინაში რუსეთის სრულმასშტაბიანი შეჭრის მხარდამჭერი გვერდის სახელწოდება, რომელიც რუსულ სოციალურ მედია პლატფორმა Vkontakte-ზე მოქმედებს. სავარაუდოდ, სურათი ყალბი აღწერით ქართულ საინფორმაციო სივრცეში სწორედ ამ გვერდიდან შემოვიდა.
ფაქტზე, რომ სურათზე რუსი სამხედრო არის ასახული, რამდენიმე დეტალი მიუთითებს. პირველ რიგში, სურათზე გამოსახულ პირს მარცხენა მხარზე ნაცისტური გერმანიის SS-ის სიმბოლო ახატია. SS არის გრაფიკული ემბლემა, რომელიც გამოსახავს ორ სტილიზებულ ელვას, რომლებიც განასახიერებენ Schutzstaffel (SS), ნაცისტური პარტიის პარამილიტარულ ორგანიზაციას. ნაცისტური სიმბოლო რუსეთის იმპერიის დროშაზე არის გადახატული.
ამავდროულად, სამხედროს მკერდზე, სვასტიკის ზემოთ, გარკვევით აწერია რუსულად სიტყვა "Русь" (რუსი).
აღნიშნული სურათი თავდაპირველად 2024 წლის თებერვალში უკრაინულმა ანგარიშებმა გაავრცელეს, რომლებიც იუწყებოდნენ, რომ პიროვნება "კანტემიროვის პირველი სატანკო პოლკის ტყვედ ჩავარდნილი რუსი ოკუპანტია. ის კუპიანსკის მახლობლად 25-ე ბრიგადის ბიჭებმა ტყვედ აიყვანეს." მას შემდეგ არ გავრცელებულა რაიმე მტკიცებულება ან ინფორმაცია, რომელიც უკრაინული წყაროების მიერ გავრცელებულ ინფორმაციას ეჭვქვეშ დააყენებდა.
იგივე პიროვნების სხვა სურათი დამატებით ამტკიცებს, რომ ის უკრაინული მხარის მიერ იქნა აყვანილი და შესაბამისად, რუსული მხარის სასარგებლოდ იბრძოდა. მეორე სურათში ჩანს, რომ ტყვე უკრაინის მხარეს მებრძოლ "მოხალისეთა რუსული კორპუსის" (российский добровольческий корпус) იმდროინდელი მეთაურის, დენის ნიკიტინის მეთვალყურეობის ქვეშ არის.
