სოციალურ ქსელში პრაიდის შესახებ შეცდომაში შემყვანი ინფორმაცია ვრცელდება
სოციალურ ქსელ „ფეისბუქში“ მომხმარებელი ავრცელებს ვიდეოს, რომელზეც შემდეგი წარწერაა დატანილი: „8 ივლისი, ბაალის კერპთაყვანისმცემლების შემუსვრა ჯვრით“ (არქივირებული ბმული). ვიდეო 2023 წლის 8 ივლისს, ლისი ვანდერლენდის ტერიტორიაზე მომხარი მოვლენების დროსაა გადაღებული. ამ წელს დახურულ ტერიტორიაზე პრაიდის ღონისძიების ჩატარება იყო დაგეგმილი. ღონისძიება ძალადობრივმა ჯგუფებმა ჩაშალეს, რომლებიც ტერიტორიაზე შეიჭრნენ და გაანადგურეს როგორც პრაიდის, ასევე ამ ტერიტორიაზე მოქმედი სხვადასხვა ბიზნესის ქონების ნაწილიც. მათ შორის, ტერიტორიაზე შეჭრილმა ადამიანებმა გაანადგურეს მოცემული სკულპტურაც. ღონისძიების დამსწრეების ევაკუაცია პოლიციის მიკროავტობუსების საშუალებით მოხდა.
პოსტში გამოთქმული მტკიცება ბაალის კერპთაყვანისმცემლობის შესახებ სწორედ პრაიდის ფესტივალის ტერიტორიაზე განთავსებულ ერთ-ერთ ქანდაკებას ეხება. ამ საკითხზე დეზინფორმაცია ადრეც ვრცელდებოდა. საკითხს მაშინ როგორც ფაქტების გადამმოწმებელი ორგანიზაცა (იხილეთ ფაქტ-მეტრის სტატია), ასევე მედიასაშუალებები (იხილეთ არქივირებული ბმული) გამოეხმაურნენ.
მაშინ "ფაქტ-მეტრი ორგანიზაცია „თბილისი პრაიდის“ თანადირექტორს მარიამ კვარაცხელიას დაუკავშირდა. გამოცემის ცნობით, სატელეფონო საუბრისას მარიამ კვარაცხელიამ ხაზგასმით აღნიშნა, რომ სკულპტურა უკვე რამდენიმე წელია ლისის ტერიტორიაზე დგას და მისი აღმართვა თბილისი პრაიდს არ უკავშირდება. ამავდროულად, მისი თქმით, სკულპტურა დგას ტერიტორიაზე, რომელიც თბილისი პრაიდ-ფესტივალისთვის გამოყოფილი საერთოდ არ ყოფილა.
პრაიდის ჩატარების ტერიტორიაზე მოცემული ინსტალაცია სინამდვილეში ამ ტერიტორიაზე რამდენიმე წლით ადრე დაიდგა. ქეთა დონაძე, EYESTAGE-ის თანადამფუძნებელი, "ნეტგაზეთს" განუმარტავს (არქივი), რომ ქანდაკება Open Air-ის ერთ-ერთი სცენის (EYESTAGE) დეკორაციული ინსტალაცია იყო. მისი თქმით, ქანდაკება წარმოადგენს ინდიელ ბელადს, რომელსაც არანაირი კავშირი არ აქვს სატანიზმთან.
სკულპტურა თბილისი პრაიდის ფესტივალისთვის არ შექმნილა, რასაც ასევე ადასტურებს 2023 წელს Tbilisi Open Air-ის ოფიციალურ გვერდზე გამოქვეყნებული ფოტო-მასალა.
