სოციალურ ქსელში ბიძინა ივანიშვილის ვიდეო კონტექსტის გარეშე ვრცელდება
სოციალურ ქსელში ვრცელდება ვიდეო, სადაც "ქართული ოცნების" დამფუძნებლის ბიძინა ივანიშვილის ინტერვიუა მოცემული (არქივირებული ბმული). გავრცელებულ მონაკვეთში ივანიშვილი ამბობს: "სულ მექნება კომპლექსი, რომ ნებისმიერი გადაწყვეტილებას ვღებულობ იმისთვის, რომ ჩემი თანხები იქნებ როგორმე დამიბრუნონ. და არა ის, რომ ჩემს ქვეყანას რაღაც სიკეთე განუვითარდეს". მონაკვეთი იმგვარადაა ამოჭრილი, რომ ქმნის შთაბეჭდილებას, თითქოს ივანიშვილი აღიარებს, რომ გადაწყვეტილებებს პირადი ინტერესებით იღებს.
სოციალურ ქსელში გავრცელებული მონაკვეთი ბიძინა ივანიშვილის ტელეკომპანია "იმედისთვის" მიცემული ინტერვიუდანაა ამოჭრილი, რომელიც ეთერში საპარლამენტო არჩევნებამდე რამდენიმე დღით ადრე 2024 წლის 21 ოქტომბერს გავიდა. მონაკვეთი, რომელიც სოციალურ ქსელში გავრცელდა, ინტერვიუს 17:35 წუთიდან იწყება, სადაც ივანიშვილი ამბობს: "მე ამერიკის ელჩს კარგად განვუმარტე რამდენჯერმე, მე შეხვედრების წინააღმდეგი კი არ ვიყავი, არც ადრე და არც დღეს. მაგას როგორ ვიკადრებ, ეს ელემენტალური უზრდელობაა. მე განვუმარტავდი, რომ ჩემთან შეხვედრას არავითარი აზრი არ ექნება. კონტრპროდუქტიული იქნება, რამეთუ ვერც ერთ გადაწყვეტილებაში მე ვერ მივიღებ მონაწილეობას. სასარგებლო რომც იყოს საქართველოსთვისაც, ევროპისთვისაც და ამერიკისთვისაც, მე მაინც ვიქნები კონტრპროდუქტიული, რამეთუ მე მაქვს კომპლექსი, რომ მე ამას ვაკეთებ იმ ფულის გულისთვის, რომელიც ხელოვნურად არის დაბლოკილი. მე ეს კომპლექსი რეალურად გამაჩნია, ყველა წესიერ ადამიანს უნდა ჰქონდეს ჩემი გადმოსახედიდან. ამერიკის ელჩს ვწერდი, ვეუბნებოდი, ეს ნაწერები მე მაქვს, რომ ეს [შეხვედრა] იქნება კონტრპროდუქტიული მხოლოდ ამ მიზეზით.
მე ვერაფრით ვერ ვიკადრებ, რომ პოლიტიკურ გადაწყვეტილებებში მივიღო მონაწილეობა იმ კომპლექსის გამო, რომ ეს ჩემს ქვეყანასთან არის კავშირში. მე ვერაფრით ვერ დავუშვებ იმას, რომ თუ გინდ ჩემს თანაგუნდელებს ვთხოვო, რომ, ვთხოვო არა, რომ პოზიცია დავაფიქსირო, რომ მოდი, აი, წინ წავიწიოთ, ეს გადავჭრათ, ცუდი არ არის. და ამ დროს ვიცი, რომ იქ შეხვედრა მქონდა, რასაც მე არ დავმალავ და ვერ დავმალავ და მოვილაპარაკე ვიღაცასთან, რომ ეს ესე უნდა გავაკეთოთ. ეს იყო მიზეზი და მე ამას კარგად განვუმარტავდი, მე მაქვს ეს კომპლექსი და სულ მექნება კომპლექსი, რომ ნებისმიერი გადაწყვეტილებას ვღებულობ იმისთვის, რომ ჩემი თანხები იქნებ როგორმე დამიბრუნონ. და არა ის, რომ ჩემს ქვეყანას რაღაც სიკეთე განუვითარდეს. ეს იყო მიზეზი. სულ მქონდა იმის კომპლექსი და გამაჩნია დღესაც, რომ ქვეყნის საზიანოდ პირადული ინტერესების გულისთვის რამე არ გავაკეთო და კარგად ვუმარტავდი [ელჩს], ბოდიშს ვუხდიდი, რომ მე არ იფიქროთ, რომ თავხედი ვარ, რომ მე ამაყი ვარ, ეს იქნება კონტრპროდუქტიული, ამას არ ექნება არავითარი ფასი, ამიტომ ტყუილად ნუ დავიღლებით. ამიტომაც ვამბობ უარს შეხვედრებზე."
ამდენად, ივანიშვილი ინტერვიუში იმის საპირისპირო აზრის განვითარებას ცდილობს, რაც სოციალურ ქსელში გავრცელებული ვიდეოდან გამომდინარეობს. სრულ ინტერვიუში ივანიშვილი ამერიკის ელჩთან შეხვედრაზე უარს ხსნის და ამბობს, რომ აღნიშნულს თავს იმიტომ არიდებდა, რომ მისი მისი შეხვედრა ან შეხვედრის შემდგომი პოზიციები არ ყოფილიყო აღქმული, თითქოს მან რაიმე ნაბიჯი საკუთარი [ფულის დაბრუნების] ინტრესებიდან გამომდინარე მიიღო.
