სოციალურ ქსელში ნიკა გვარამიას შესახებ რედაქტირებული ვიდეო ვრცელდება
სოციალურ ქსელში მომხმარებელმა ნიკა გვარამიას შესახებ რედაქტირებული ვიდეო გაავრცელა. ვიდეო იმგვარადაა დამუშავებული, კერძოდ მოჭრილია და მასზე გადადებულია სხვა - ვიდეოსთან კავშირში არმყოფი ხმის ჩანაწერი, რომ ერთობლიობაში ნიკა გვარამიას მოცემულ ეთერს „ნარკოტიკების მოხმარებასთან“ აკავშირებს.
ვიდეოში ორი მონაკვეთია გადაბმული. პირველ მონაკვეთში ნიკა გვარამია საუბრობს "გაჩხერვაზე", ხოლო მეორე მონაკვეთში ნიკა გვარამიას ხმა აღარ ისმის და მას ადევს სიმღერა შემდეგი ტექსტით: „ნარკომანი მამალი სამჯერ გაიჩხირავს და კაიფშია მამალი“.
ვიდეოს პირველი მონაკვეთი ინგა გრიგოლიას ეთერში ნიკა გვარამიას სტუმრობიდანაა მოჭრილი. ვრცელი ინტერვიუს ამ ნაწილში პოლიტიკოსი საქართველოს ხელისუფლების ირანთან დამოკიდებულებას აფასებს. ამ ინტერვიუში სიტყვას „გაჩხერვა“ ნიკა გვარამია სხვა მნიშვნელობით იყენებს (07:00-დან). „ხელისუფლება, რომელიც რისკებს წარმოშობს, როცა ომი მიმდინარეობს 500 კილომეტრში ქვეყნის დედაქალაქიდან, თბილისიდან 500 კილომეტრში და მაგალითად ანძის ანთების საჭიროება რა იყო, მაგალითად იქ მისვლა, მიღებაზე ირანის საელჩოში, ეს ხდება 1 კვირით ადრე... და ამას რა ქვია, ამას ხომ ჰქვია შეგნებულად გაჩხერვა დასავლეთის წინააღმდეგ. გახსოვთ ბიძინა ივანიშვილს რა ჰქონდა ნათქვამი - ჩვენ არ უნდა ვიყოთ განხეთქილების ვაშლი რუსეთსა და დასავლეთს შორის“, - ამბობს პოლიტიკოსი.
ვიდეოს მეორე მონაკვეთი მოჭრილია 2021 წლის 5 სექტემბერს „მთავარი არხის“ ეთერში გასული გადაცემიდან. ვიდეოში ნიკა გვარამიას პერფორმანსი ჩანს, რომელშიც მაშინ „მთავარი არხის“ გადაცემა „მთავარი აქცენტების“ წამყვანი მიუთითებს, რომ ვაქცინაციის ნემსი კიდევ უფრო პატარაა, მასში კიდევ უფრო ცოტა მედიკამენტია, რომ ვაქცინის გაკეთება თავისით არ მოუწევთ, დახვდებათ „არაჩვეულებრივი მედდა და ზუსტად ერთ წამში ამთავრებს პროცედურას“. ვიდეოს ბოლოს ნიკა გვარამია მიუთითებს, რომ სწორედ ვაქცინაციაზეა დამოკიდებული არამარტო ერთეული ადამიანის, არამედ მისი ოჯახის წევრებისა და ახლობლების სიცოცხლის საკითხი.
ამრიგად, მოცემული ვიდეო არაფერ კავშირშია ნარკოტიკული საშუალებების მოხმარებასთან. სინამდვილეში ვიდეოს ერთ ნაწილში პოლიტიკოსი ირანისადმი საქართველოს ხელისუფლების დამოკიდებულებას აფასებს, ხოლო მეორე ნაწილი კოვიდპანდემიის დროს ვაქცინაციის კამპანიის მხარდამჭერი პერფორმანსია და კადრში სწორედ ვაქცინაციის პროცესის სიმულაციაა მოცემული. სოციალურ ქსელში გავრცელებული ვიდეო კი იმგვარადაა დამუშავებული, რომ მნახველი შეცდომაში შეჰყავს.
