არ დასტურდება ინფორმაცია ირანის განცხადების შესახებ, რომ საქართველოში აშშ-ის საელჩოს არ დაბომბავს
2026 წლის 5 მარტს, ირანის წინააღმდეგ აშშ-ისრაელის საერთო სამხედრო ოპერაციის და ირანის მიერ აზერბაიჯანის ტერიტორიაზე დრონებით განხორციელებული თავდასხმების პარალელურად, "ქართული ოცნების" მხარდამჭერმა გვერდებმა და პროფილებმა გაავრცელეს ინფორმაცია, რომლის მიხედვითაც ირანის საპასუხო საჰაერო იერიშების სამიზნეთა შორის საქართველოში აშშ-ის საელჩო არ იქნებოდა (ბმული 1, 2). ინფორმაციის დასტურად კი მოყვანილია ირანული ტელევიზიის ეთერის სურათი, სადაც სპარსულ ენაზე წერია - "ირანი არ დაესხმევა თავს აშშ-ის საელჩოს საქართველოში" (არქივი).
აღნიშნული ინფორმაციის გამავრცელებელთა ნაწილს წყაროდ "ირანული მედია "Iranian" მოჰყავს, ნაწილს კი ირანის საგარეო საქმეთა სამინისტროს პრეს-მდივანი, ესმაილ ბაღაეი.
ირანული მედია სახელწოდებით "Iranian" არ არსებობს. ირანში მოქმედებს ირანის სახელმწიფო მაუწყებელი (Islamic Republic of Iran Broadcasting - IRIB), რომელიც მართავს კონკრეტულ არხებს, როგორიცაა IRIB TV1, IRIB TV2, IRINN (Islamic Republic of Iran News Network). სურათზე სწორედ ამ უკანასკნელის ვებგვერდის მისამართს ვკითხულობთ - IRINN.IR, თუმცა მსგავსი ვებგვერდი, რეალურად, არ არსებობს.
რაც შეეხება ირანის საგარეო საქმეთა სამინისტროს პრეს-მდივანს, ირანულ, ქართულ და საერთაშორისო წყაროებში არ იძებნება ინფორმაცია, რომ მან მსგავსი განცხადება გააკეთა. ინფორმაციას მხოლოდ ცალკეული სოციალური მედიის გვერდები და პროფილები ავრცელებენ, რომლებსაც, თავის მხრივ, მათ მიერ გავრცელებული ინფორმაციის დამადასტურებელი წყარო არ აქვთ წარმოდგენილი.
არაავთენტურია სატელევიზიო სტუდიის სურათიც. ის არ ჰგავს IRINN-ის ეთერში გასული ახალი ამბების გადაცემის სტუდიას. საეჭვო არის ასევე ის ფაქტი, რომ სურათში არ ჩანს ახალი ამბების წამყვანი, თუმცა ფონზე ჩანს ტელევიზორი, რომელშიც აშშ-ის საელჩოს სურათი ციფრულად არის ჩასმული.
ირანის ისლამური რესპუბლიკის ახალი ამბების არხის სტუდია
