თსუ-ის და სტუ-ის გაერთიანება - ივანე ჯავახიშვილის ოცნება თუ გამოგონილი ციტატა?
მოკლედ საკითხავი
ვრცელდება ივანე ჯავახიშვილის ციტატა, რომლის მიხედვითაც ის თბილისის სახელმწიფო უნივერსიტეტის და სახელმწიფო პოლიტექნიკური ინსტიტუტის გაერთიანებაზე ოცნებობდა
გაზეთი "საქართველო", რომელშიც თითქოს ჯავახიშვილის ციტატა გამოქვეყნდა, საქართველოს ტექნიკური უნივერსიტეტის დაარსებამდე გამოიცემოდა
გაზეთ "საქართველოს" ფოტოანაბეჭდი რედაქტირებულია
სოციალურ ქსელში ვრცელდება საქართველოს დემოკრატიული რესპუბლიკის პერიოდის გაზეთ "საქართველოს" ფოტოანაბეჭდი, რომელშიც, თითქოს, გამოქვეყნდა ცნობილი ქართველი ისტორიკოსის, საზოგადო მოღვაწის და თბილისიწს სახელმწიფო უნივერსიტეტის თანადამფუძნებლის, ივანე ჯავახიშვილის ციტატა - "ჩემი ოცნებაა თბილისის სახელმწიფო უნივერსიტეტის და სახელმწიფო პოლიტექნიკური ინსტიტუტის გაერთიანება".
ციტატის გავრცელება, სავარაუდოდ, უკავშირდება "ქართული ოცნების" 2026 წლის 29 იანვრის გადაწყვეტილებას თსუ-ის და სტუ-ის გაერთიანების შესახებ. აქამდე, ივანე ჯავახიშვილის მსგავსი ციტატა არ გავრცელებულა და ღია წყაროებში არც ახლა იძებნება.
ფოტოანაბეჭდი გაზეთ "საქართველოს" გვერდის რედაქტირების შედეგად შეიქმნა, რაზეც მოწმობს გაზეთის სათაურის შრიფტი.
ყალბი ფოტოანაბეჭდი
გაზეთ "საქართველოს" რეალური გამოცემა
გაზეთი "საქართველო" საქართველოს ეროვნულ-დემოკრატიული პარტიის მიერ 1915-1921 წლებში, რუსეთის წითელი არმიის საქართველოს დემოკრატიული რესპუბლიკის ანექსიამდე გამოიცემოდა, საქართველოს ტექნიკური უნივერსიტეტი კი 1922 წლის 1922 წლის 16 იანვარს, თბილისის სახელმწიფო უნივერსიტეტის პოლიტექნიკური ფაკულტეტის სახით დაარსდა. ამავდროულად, ციტატაში ივანე ჯავახიშვილს მიაწერენ სიტყვებს "სახელმწიფო პოლიტექნიკური ინსტიტუტი". აღნიშნული სახელწოდება საქართველოს ტექნიკურ უნივერსიტეტს 1948 წელს მიენიჭა, ივანე ჯავახიშვილი კი 1940 წელს გარდაიცვალა.
აქედან გამომდინარე, ივანე ჯავახიშვილი სტუ-ის დაარსებამდე მის თსუ-თან შეერთებაზე ვერ ისაუბრებდა. ის ასევე ვერ უწოდებდა დღევანდელ სტუ-ს სახელმწიფო პოლიტექნიკურ უნივერსიტეტს, ვინაიდან, აღნიშნული სახელწოდება სასწავლებელმა ივანე ჯავახიშვილის გარდაცვალების შემდეგ მიიღო. მოცემული ორი ქრონოლოგიური უზუსტობა მიანიშნებს, რომ ციტატა ყალბია.
ფოტოანაბეჭდს ასევე აქვს რედაქტირების კვალი. პირველ რიგში, ერთი ადამიანის პორტრეტი და ერთწინადადებიანი ციტატა არცერთი გაზეთის პირველ გვერდს დაიკავებდა. 1910-20-იანი წლების გაზეთებისთვის შეუსაბამოა ასევე შრიფტი, რომლითაც ციტატა არის დაწერილი. ამავდროულად, ფოტოანაბეჭდს ეტყობა, რომ რეალური გამოცემის ტექსტი გადაღებილია და მასზე ყალბი ციტატა გადაწერილია.
შრიფტი ყალბი ფოტოანაბეჭდიდან 
შრიფტი გაზეთ "საქართველოს" რეალური გამოცემიდან
