ჯეფრი ეპსტინის საბანკო ანგარიში დემონი ბაალის სახელზე რეგისტრირებული არ იყო
მოკლედ საკითხავი
მტკიცება, რომ ჯეფრი ეპსტინის საბანკო ანგარიში ბაალის სახელზე იყო რეგისტრირებული, მანიპულაციურია
სავარაუდოდ, Baal. name ბეჭდვითი შეცდომის შედეგია და მის ნაცვლად Bank Name უნდა ეწეროს
დოკუმენტში სხვა ბეჭდვით შეცდომებსაც ვხვდებით, ბაალის სახელი კი სხვა არც ერთ დოკუმენტში არ იძებნება
სოციალურ ქსელში ვრცელდება მტკიცება, თითქოს ჯეფრი ეპსტინის საბანკო ანგარში დემონი ბაალის სახელზე იყო რეგისტრირებული. პოსტს თან ახლავს ფოტო, რომელზეც სკანირებული დოკუმენტია ასახული, მის ერთ-ერთ ველში კი მართლაც ვკითხულობთ სიტყვას - Baal.
ბაალი ახლო აღმოსავლური ღმერთის სახელია ებრაულად. მას ძირითადად ქანაანელები ეთაყვანებოდნენ და ნაყოფიერების ღმერთად მიიჩნევდნენ. ძველ აღთქმაში ბაალი მიჩნეული იყო ისრაელიტების ღმერთის - იაჰვეს - მთავარ მტრად.
სოციალურ ქსელში გავრცელებული სკანირებული დოკუმენტი აშშ-ის იუსტიციის დეპარტამენტმა გამოაქვეყნა. იგი ელექტრონულ მიმოწერას ასახავს, 2009 წლის 29 ივლისით თარიღდება და ჯეფრი ეპსტინის სახელით JP Morgan-ის (უდიდესი საბანკო დაწესებულება აშშ-ში) წამომადგენელთან არის გაგზავნილი. მეილში დაახლოებით 11,000 დოლარის გადარიცხვაა მოთხოვნილი, მიმღები პირის მონაცემები კი დაფარულია. მეილში ტრანზაქციისთვის საჭირო ყველა მონაცემია მითითებული სხვადასხვა ველში, მათ შორის, ანგარიშის სახელი. სწორედ ერთ-ერთ ასეთ ველში ვხვდებით სიტყვებს: Baal. name.
სავარაუდოა, რომ დოკუმენტში Baal. name-ში ბეჭდვითი შეცდომაა და მის ნაცვლად უნდა ეწეროს Bank Name (ბანკის სახელი). ამაზე მიუთითებს, რომ მის გასწვრივ მართლაც ბანკის სახელია შეყვანილი. კერძოდ, მითითებულია Wachovia Bank, N.A. რომელიც იმ დროისთვის აშშ-ის მეოთხე უდიდეს საბანკო დაწესებულებას წარმოადგენდა ჩრდილოეთ ამერიკაში (N.A.). დამატებით, მსგავსი შინაარსის სხვა დოკუმენტებში, რომელიც იუსტიციის დეპარტამენტმა გამოაქვეყნა, ამ გრაფაში ყველგან Bank Name, ანუ ბანკის სახელი გვხვდება (1, 2):
ამის საპირისპიროდ, სიტყვა ბაალი/Baal იუსტიციის დეპარტამენტის მიერ გამოქვეყნებულ სხვა არც ერთ დოკუმენტში არ იძებნება.
ამრიგად, მტკიცება, რომ ჯეფრი ეპსტინს საბანკო ანგარიში დემონი ბაალის სახელზე ჰქონდა რეგისტრირებული, მანიპულაციურია.
