გიორგი კირთაძის ინტერვიუდან მონაკვეთი მანიპულაციურად ვრცელდება

მოკლედ საკითხავი:

• გიორგი კირთაძის შესახებ გავრცელებულ ვიდეოში მისი ინტერვიუ მანიპულაციურადაა მოჭრილი;

• ვიდეო მომხმარებელში აჩენს წარმოდგენას, რომ წამყვანის კითხვაზე კირთაძეს პასუხი არ გააჩნია;

• რეალურად, რამდენიმეწამიანი ყოყმანის შემდეგ, გიორგი კირთაძე წამყვანს პასუხს სცემს.

სოციალურ ქსელში ანონიმური გვერდი ავრცელებს ვიდეოს, რომელშიც „ტვ პირველის“ გადაცემიდან მანიპულაციურად მოჭრილი კადრებია ასახული. პარტია „კოალიცია ცვლილებებისთვის“ წევრი გიორგი კირთაძე ანა ახალაიას გადაცემაში „დღის ამბები“ სტუმრობდა. ვიდეოში წარმოჩენილია, რომ წამყვანის კითხვაზე, თუ კიდევ რა გზა არსებობს ოპოზიციის მიზნების მისაღწევად, კირთაძე პასუხისას ყოყმანობს. ვიდეოს ბოლო მონაკვეთში იუმორისტული გადაცემიდან მოყვანილია კადრები, რაც მომხმარებელში აჩენს წარმოდგენას, რომ წამყვანის კითხვაზე კირთაძეს პასუხი არ გააჩნია.

2026 წლის 25 იანვარს ტელეკომპანია „პირველის“ ეთერში, ანა ახალაიას „დღის ამბებში“ სტუმრად მიწვეულმა გიორგი კირთაძემ საქართველოში მიმდინარე პოლიტიკურ პროცესებსა და სტრატეგიული ქმედებების შესახებ ისაუბრა. გადაცემის მიმდინარეობისას წამყვანი პოლიტიკოსს სამომავლო ნაბიჯების შესახებ უსვამს შეკითხვას:

„იცით, რა მაინტერესებს თქვენგან, მე ძალიან ხშირად ვსვამ ამ კითხვას, როგორ ხედავთ, ივანიშვილი როგორ მარცხდება? ეს მინდა, რომ რაღაცნაირად დავინახოთ. გრძელვადიანი პროტესტი გასაგებია და მე, პირადად, ვარ ამ პროტესტის გულშემატკივარი. თუმცა, არსებობს რაღაც სკეპტიციზმიც, ხო? ეს პროტესტი გრძელდება და რაღაც ეტაპზე ივანიშვილი იღლება? მისით მიდის? ამას ხომ არ გააკეთებს ადამიანი, რომელიც ძალაუფლების შესანარჩუნებლად ყველაფერზეა წამსვლელი და ამას ვხედავთ. მშვიდობიანი დამხობა ვერ გამოვიდა, არჩევნებში უდიდესი ნაწილი პარტიების მონაწილეობას არ იღებთ იმიტომ, რომ ცუდი არჩევნები ტარდება; ვინც იღებს, ის კონკრეტულ შედეგს ვერ დებს. რა გზა არსებობს მაშინ კიდევ ივანიშვილის დამარცხების?“

სწორედ ამ კითხვის შემდეგ რამდენიმე წამით შეყოყმანდა გიორგი კირთაძე, თუმცა, რეალურად, ჟურნალისტი პასუხის გარეშე არ დაუტოვებია:

„ეს არის კითხვა, რომელზე პასუხსაც ვამბობდი და გავაგრძელებ, რასაც ვამბობდი. არაღიარება რეჟიმის, მუდმივი წინააღმდეგობა მასთან და პროტესტი ყველგან და ყველაფერში და პროტესტის მრავალფეროვნება. კიდევ უფრო გაძლიერებული პროტესტი შიგნით ქვეყანაში. პროპაგანდასთან ეფექტური  და ერთობლივი ძალებით ბრძოლა და საგარეო ფრონტზე ერთობლივი მუშაობა. ეს არის ის მთავარი შემადგენელი ნაწილი იმ წინააღმდეგობისა, რომელიც, ჩვენ მიგვაჩნია, რომ მიგვიყვანს შედეგამდე. როგორ სრულდება, სად არის ის ბოლო დღეს, როდესაც ბიძინა ივანიშვილი თანხმდება ამ ქვეყანაში სამართლიანი არჩევნების ჩატარებას ან უბრალოდ გარბის ამ ქვეყნიდან და ტარდება მერე მის გარეშე სამართლიანი არჩევნები?!… საბოლოო ჯამში, მე წარმომიდგენია, რომ ეს მოხდება მაშინ, როდესაც საკმარისი ადამიანი იქნება ბიძინა ივანიშვილზე არამხოლოდ გაბრაზებული, არამედ ამ გაბრაზებას გამოხატავს მშვიდობიანად ქუჩაში გამოსვლით. ეს იქნება თბილისი თუ საქართველოს ყველა ქალაქი და რაიონი, თუ, არ ვიცი, ყველანი ერთად საბოლოოდ შეკრებილი დედაქალაქში. მაგრამ ეს აუცილებლად მოხდება, თუ ჩვენ ამ ქვეყანაში პროტესტს არ შევამცირებთ…“

ამრიგად, გიორგი კირთაძე ჟურნალისტის მიერ დასმულ კითხვას სამომავლო ქმედებებზე რამდენიმეწამიანი ყოყმანის შემდეგ პასუხობს. თუმცა ეს ნაწილი სოციალურ ქსელში გავრცელებულ ვიდეოში სრულად მოჭრილია და წარმოჩენილია, თითქოს მას ამ კითხვაზე პასუხი არ გაუცია.