სოციალურ ქსელში პოეტ ზვიად რატიანის მხარდამჭერი აქციიდან მანიპულირებული ვიდეო ვრცელდება

სოციალურ ქსელში ვირუსულად ვრცელდება ვიდეო (1, 2, 3, 4) (დაარქივებული ბმული) აღწერით: „ცეცხლი საქართველოსო… ეზიზღებათ საქართველო და ქართველები ამ მოღალატეთა ერთ მუჭა ბრბოს“; “ცეცხლი საქართველოსო” უკვე ვეღარ მალავენ როგორ სძულთ ეს ქვეყანა!“. ვიდეო პრო-ევროპული აქციიდან ვრცელდება მოჭრილი სახით და ამგვარ აღწერასთან ერთად შეცდომაში შემყვანია. სინამდვილეში, სრულ ვიდეოში აქციის მონაწილეების სხვა შეძახილი ისმის.

სოციალურ ქსელში გავრცელებული ვიდეოს ერთ-ერთ მონაკვეთში ისმის პრო-ევროპული პროტესტის მონაწილეების შეძახილი „[ეს] პოეტი ზვიად რატიანის დამსახურებაა. თავისუფლება ზვიად რატიანს!“. ამასთანავე, ვიდეოში ცხადად ჩანს, რომ მათ ხელში უჭირავთ ბანერი წარწერით: „ხალხი იმსახურებს დამოუკიდებელ საზოგადოებრივ მაუწყებელს“.

აღსანიშნავია, რომ 2025 წლის 20 აგვისტოს თბილისში პოეტ ზვიად რატიანის მხარდასაჭერი აქცია ჩატარდა სახელად – „ზვიად რატიანის თავისუფლებისთვის“. აქციის ფარგლებში მოქალაქეები თავისუფლების მოედანზე შეიკრიბნენ და წმინდა გიორგის მონუმენტის გარშემო ცოცხალი ჯაჭვი შეკრეს.

აღნიშნული საპროტესტო აქციიდან სოციალურ ქსელში რამდენიმე ვიდეო გავრცელდა სხვადასხვა რაკურსით (მაგალითი 1, 2), მათ შორისაა მხატვარ ირაკლი სოსელიას ე.წ. ლაივ-ვიდეო (დაარქივებული ბმული). როგორც ვიდეოში ჩანს, ირაკლი სოსელია პროტესტის მონაწილეთა სწორედ იმ ჯგუფთან ერთად შეუერთდა ჯაჭვს, რომელსაც ვირუსულად გავრცელებულ ვიდეოებში ვხედავთ. მის მიერ გადაღებულ და გავრცელებულ ვიდეოში კი გარკვევით ისმის ამ მარშის მონაწილეების შეძახილები, მათ შორის ის მონაკვეთიც, რომელსაც Facebook-მომხმარებლები მოჭრილი სახით ავრცელებენ.

ის, რომ სოციალურ ქსელში გავრცელებული მანიპულაციური ვიდეო და სოსელიას ლაივ-ვიდეო ერთსა და იმავე აქციას აღწერს, ვიდეოს ვიზუალური შედარებითაც დასტურდება. ვირუსულად გავრცელებული ვიდეოს იმ ნაწილში, რომელშიც პროტესტის მონაწილეები, Facebook-ანგარიშების მტკიცებით, ამბობენ – ცეცხლი საქართველოს, ვხედავთ, რომ კადრში პოლიციის თანამშრომელი გარბის.

პოლიციის სირბილის ეპიზოდი ჩანს ირაკლი სოსელიას ვიდეოშიც, ზუსტად იმ მონაკვეთში, როდესაც პროტესტის მონაწილე ამბობს „დასავლეთ საქართველოს“ (1:51 წუთი).

რაც შეეხება პროტესტის მონაწილეების რეალურ შეძახილს, ფეისბუქ ლაივ-ვიდეოს 0:53 წუთზე ისმის შემდეგი ტექსტი: „დღეს ჩვენს ქვეყანაში 60-ზე მეტი პოლიტიკური პატიმარი გვყავს. პოლიტიკურ პატიმრებს შორის არის პოეტი ზვიად რატიანი. ზვიად რატიანი აგვისტოს ომის მონაწილეა. აგვისტოს ომის დღეებში ზვიად რატიანი მუშაობდა კომპანია „ჯეოსელში“. ის დათანხმდა ფრონტზე წასვლას მაშინ, როდესაც ოკუპანტები ბოჭკოვან კაბელებს აფეთქებდნენ. თქვენ თუ აგვისტოს ომის დღეებში ჯარისკაცებს უკავშირდებოდით, ეს ზვიად რატიანის დამსახურებაა. თქვენ თუ აგვისტოს ომის დღეებში ტელევიზორს უყურებდით, ეს ზვიად რატიანის დამსახურებაა. აგვისტოს ომის დღეებში აღმოსავლეთ და დასავლეთ საქართველო რომ კავშირს არ კარგავდა, ეს პოეტის ზვიად რატიანის დამსახურებაა. თავისუფლება ზვიად რატიანს!“.

ამრიგად, აქციის ორიგინალ ლაივ ჩანაწერში არ დასტურდება შეძახილის „ცეცხლი საქართველოს“ არსებობა.