„იმედი“ და „პოსტვ“ მიხეილ სააკაშვილის პოსტთან დაკავშირებით მანიპულაციურ ქარდს ავრცელებენ
Facebook-ზე პროსახელისუფლებო მედიები „იმედი“ და „პოსტვ“ ქარდს ავრცელებენ, რომელზეც საქართველოს მესამე პრეზიდენტის, მიხეილ სააკაშვილის პოსტიდან ციტატაა დატანილი. პოსტში სააკაშვილი წერს, რომ 2013 წელს ტრამპმა მას ჰკითხა, რას იტყოდა ხელმეორედ რომ ეყარა კენჭი. „იმედი“ და „პოსტვ“ საპასუხოდ ამტკიცებენ, რომ ტრამპი პრეზიდენტად 2016 წელს აირჩიეს (არქივირებული ბმული 1; 2).
ინფორმაცია იმის შესახებ, რომ დონალდ ტრამპი პრეზიდენტად პირველად 2016 წელს აირჩიეს, სიმართლეა, თუმცა ტრამპს 2016 წლამდეც ჰქონდა საპრეზიდენტო კანდიდატურა წამოყენებული.
დონალდ ტრამპი აშშ-ის პრეზიდენტი პირველად 2016 წელს გახდა, ის რესპუბლიკური პარტიის კანდიდატი იყო. 2020 წელს ტრამპი დემოკრატიული პარტიის კანდიდატთან, ჯო ბაიდენთან დამარცხდა, ხოლო 2024 წელს, დემოკრატების კანდიდატი კამალა ჰარისი დაამარცხა და აშშ-ის პრეზიდენტი გახდა.
დონალდ ტრამპმა აშშ-ის პრეზიდენტობის კანდიდატად საკუთარი კანდიდატურა პირველად 2000 წელს დააყენა. 1999 წელს ის რეფორმების პარტიას შეუერთდა და სწორედ ამ პარტიის სახელით გეგმავდა არჩევნებში მონაწილეობის მიღებას. ტრამპმა ამ პერიოდში TRUMP 2000 კამპანიაც კი აწარმოვა, თუმცა საბოლოოდ, მარათონს გამოეთიშა, რადგან თვლიდა, რომ რეფორმის პარტია თავად იშლებოდა და ვერ უზრუნველყოფდა იმ მხარდაჭერას, რაც საჭირო იყო გამარჯვებისთვის.
შესაბამისად, „იმედისა“ და „პოსტვ-ს“ მტკიცება მანიპულაციურია. დონალდ ტრამპს შეეძლო 2013 წელს საკუთარი კანდიდატურის ხელახლა დაყენებაზე ესაუბრა, ვინაიდან თავდაპირველად მან ეს 2000 წელს გააკეთა, ხოლო 2015-ში ეს მეორე შემთხვევა იყო.
