სოციალურ ქსელში ნათია გოგსაძის ინტერვიუს ფრაგმენტი მცარი კონტექსტით ვრცელდება
სოციალურ ქსელებში TikTok-სა და YouTube-ზე ვრცელდება ტელეკომპანია „ფორმულას“ პოლიტიკური გადაცემის ფრაგმენტი, რომელშიც ჟურნალისტი ნათია გოგსაძე ამბობს: „დიახაც, რას დაემსგავსეთ, ჩაიხედეთ სარკეში, თქვენ ის ადამიანები ხართ და მოგწონთ თქვენი თავი?“ აღნიშნული სიტყვების წარმოთქმის დროს ეკრანის მეორე ნახევარში აქტივისტი გიორგი ახობაძე ჩანს. ვიდეო თან ერთვის აღწერა, რომ ჟურნალისტი ამ სიტყვებით გიორგი ახობაძეს მიმართავს. (არვიქირებული ბმული).
აღნიშნული ფრაგმენტი ამოჭრილია 2026 წლის 19 აგვისტოს პირდაპირ ეთერში გასული გადაცემიდან. სრული ინტერვიუს ნახვისას ცხადი ხდება, რომ გოგსაძის სიტყვები მმართველ პარტიას, „ქართული ოცნებას“ მიემართება და არა ახობაძეს ან სხვა იმ აქტივისტების მიმართ, რომლებიც საქართველოში მიმდინარე პოლიტიკური პროტესტის მონაწილეები არიან.
ნათია გოგსაძის სრული განცხადება ასეთია (მე-5 წუთიდან): „რეალობა გვაქვს, რომ ისინი [„ქართული ოცნება“] ქვეყნის ინტერესებს არ ატარებენ, ევროკავშირზე უარი თქვეს, რაც იყო ჩვენი, ქართველების, საუკუნოვანი ოცნება, ქვეყნის განვითარება სრულიად შემოატრიალეს, მიაბეს რუსეთს, რომელიც აბსოლუტურად, თითქმის გაკოტრებული ქვეყანა ხდება, ხო. და ამაზე გვექნება ლაპარაკი კიდევ ერთხელ, ვიტყვი გადაცემის მეორე ნაწილში. და ამის შემდეგ უკვე აღარ უნდათ, საყვედურიც კი არ უნდათ, რომ მოისმინონ და ვინმემ უთხრათ, რომ დიახაც, რას დაემსგავსეთ, აი, ჩაიხედეთ სარკეში, თქვენ ის ადამიანები ხართ და მოგწონთ თქვენი თავი. აი, ამის მითითებელიც აღარ უნდათ, რომ ჰყავდეთ. და როგორ ფიქრობთ, რამდენად გამოუვათ ეს, აი, ამ ტიპის რეპრესიული გადაწყვეტილებებით?“
ცნობისთვის, საპროტესტო აქციების მონაწილე ექიმს, გიორგი ახობაძეს, თბილისის საქალაქო სასამართლომ 25-დღიანი პატიმრობა შეუფარდა ფეისბუკ-პოსტის გამო, რომელშიც ის პოლიციელებს აგინებდა. გადაწყვეტილება მოსამართლე მანუჩარ ცაცუამ 24 ივლისს გამოიტანა.
შესაბამისად, გოგსაძე ახობაძის პატიმრობას სწორედ იმ ფაქტის მაგალითად განიხილავს, რომ მმართველ პარტიას კრიტიკის მოსმენა აღარ სურს. ამდენად, ვიდეო შეცდომაში შემყვანია, რადგან ფრაგმენტი ისეა მოჭრილი, რომ თანდართულ აღწერასთან ერთად მცდარად მიუთითებს, თითქოს გოგსაძე აღნიშნულ სიტყვებს გიორგი ახობაძეს ეუბნება.
