ამერიკული F-15-ების ჩამოგდების გამო ქუვეითში ოფიცრის დაჯილდოების შესახებ ინფორმაცია სიმართლეს არ შეესაბამება
სოციალურ ქსელ Facebook-ში ვრცელდება მტკიცება (ბმული 1, 2), რომლის მიხედვითაც ქუვეითში პრინცმა აშშ-ს სამი ავიაგამანადგურებლის შეცდომით ჩამოგდებაზე პასუხისმგებელი პილოტი დააჯილდოვა (არქივირებული ბმული).
სინამდვილეში, აღნიშნული ინფორმაცია სიმართლეს არ შეესაბამება.
ირანში მიმდინარე სამხედრო მოქმედებების ფარგლებში ე.წ. „მეგობრული ცეცხლის“ შედეგად ამერიკული ავიაგამანდგურებლების ჩამოგდების ფაქტი ნამდვილად მოხდა. აშშ-ს ცენტრალური სარდლობის მიერ გავრცელებული ინფორმაციის მიხედვით, 1 მარტს სამხედრო ოპერაციების ფარგლებში, აქტიური შეტაკებების დროს, რომელშიც ირანული ბალისტიკური რაკეტების, დრონებისა და ირანული ავიაციის წინააღმდეგ ოპერაცია მიმდინარეობდა, ქუვეითურმა საჰაერო თავდაცვამ შემთხვევით სამი ამერიკული სამხედრო თვითმფრინავი ჩამოაგდო. ეკიპაჟის ყველა წევრი გადარჩა (კატაპულტირდა), ისინი უსაფრთხოდ არიან და მათი მდგომარეობა სტაბილურია. ქუვეითმა აღნიშნული ინციდენტი აღიარა. თავის მხრივ, პრესრელიზის ბოლოს აშშ-ს სარდლობა მადლობას უხდის ქუვეითს მიმდინარე ოპერაციაში დახმარებისთვის და დამატებითი ინფორმაციის გავრცელებას გამოძიების დასრულების შემდეგ აანონსებს.
ქუვეითის მიერ სამხედროების დაჯილდოების შესახებ ინფორმაცია არც ერთ სანდო მედიას არ გაუვრცელებია. გარდა ამისა, გავრცელებული ფოტო მხოლოდ არასანდო და სოციალური მედიის მომხმარებლების მიერ ვრცელდება (ბმული 1, 2). სოციალურ ქსელში ცალკეულმა გამავრცელებლებმა მიუთითეს, რომ ფოტო სატირული მიზნითაა გამოქვეყნებული.
ფოტოს აშკარად ეტყობა დამუშავების კვალი. სხვადასხვა წყაროზე გავრცელებულ ფოტოში განსხვავებულია სამხედროს სახე, ნაწილში სახე სპეციალურადაა დამუშავებული იმგვარად, რომ მიუთითოს სამხედროს მხედველობის პრობლემაზე, როგორც მომხდარი ინციდენტის მიზეზზე, განსხვავებულია სამხედრო ტანსაცმელზე არსებული შევრონები. ამასთან, სურათის ფონზე არსებული პრეზენტაცია, რომელზეც ჩამოგდებული თვითმფრინავების ფოტოებია, სინამდვილეში ასევე ფოტოდამუშავების პროგრამის / ხელოვნური ინტელექტის საშუალებითაა ჩასმული.
ამასთან, გავრცელებულ ფოტოს არაბული გაზეთი Al-Nahar გამოეხმაურა და აღნიშნა, რომ უკან გამოსახულ პრეზენტაციაზე არაბული ტექსტი არ არის გამართული არაბულით დაწერილი. გაზეთმა ფოტოზე არსებული უზუსტობების გათვალისწინებით დაასკვნა, რომ ის, სავარაუდოდ, ხელოვნური ინტელექტის გამოყენებითაა დამუშავებული.
ამდენად, გავრცელებული ფოტო და მტკიცება სიმართლეს არ შეესაბამება.
