მცდარია ინფორმაცია, თითქოს აშშ-ის კონგრესში რვა ტრანსგენდერი ქალი აირჩიეს
სოციალურ ქსელში ვრცელდება პოსტი და რუსულენოვანი ფოტო, რომლის მიხედვით აშშ-ის კონგრესში რვა ტრანსგენდერი ქალი აირჩიეს (არქივირებული ბმული).
ეს ინფორმაცია მცდარი და მანიპულაციურია. რეალურად, 2026 წლის 3 ნოემბრის შუალედურ არჩევნებში რვა ტრანსგენდერმა კანდიდატმა გაიმარჯვა, თუმცა მათგან მხოლოდ ერთი გახდა აშშ-ის კონგრესის წევრი. დანარჩენი შვიდი სხვადასხვა შტატის საკანონმდებლო ორგანოებში აირჩიეს.
აშშ-ის კონგრესის არჩევნებში მხოლოდ სარა მაკბრაიდმა (არქივი) გაიმარჯვა, რომელიც დელავერის შტატს წარმოადგენს. მაკბრაიდი აშშ-ის ისტორიაში პირველი ღიად ტრანსგენდერი კონგრესმენი გახდა, თუმცა არა წლევანდელ არჩევნებში პირველად მაკბრაიდი 2024 წელს აირჩიეს, ხოლო 2026 წლის არჩევნებში მან მანდატი შეინარჩუნა.
დანარჩენი შვიდი კანდიდატი - ლი ფინკე (მინესოტა), ზუი ზეფირი (მონტანა), ელისონ მონტგომერი (ალაბამა), ბენტლი ჰაჯინსი (ჯორჯია), ჯოანა უეილი (მიჩიგანი), ჯეილინ სკოტი (ვაშინგტონი) და დინა ნინა მარტინეს-რეზერფორდი (ვისკონსინი) - შესაბამისი შტატების საკანონმდებლო ორგანოებში აირჩიეს.
აშშ-ის კონგრესი ფედერალური საკანონმდებლო ორგანოა, რომელიც წარმომადგენელთა პალატისა და სენატისგან შედგება. შტატებს კი საკუთარი საკანონმდებლო ორგანოები აქვთ, რომელთა უფლებამოსილება შესაბამისი შტატის ტერიტორიაზე ვრცელდება. შესაბამისად, შტატის საკანონმდებლო ორგანოში გამარჯვება კონგრესში არჩევას არ ნიშნავს.
