სოციალურ ქსელებში თინა ბოკუჩავას გამოგონილი ციტატა ვრცელდება

სოციალურ ქსელ „ფეისბუქში“ ვრცელდება ფოტო, რომელზეც თინა ბოკუჩავას გამოგონილი ციტატაა დატანილი (ბმული 1, ბმული 2, ბმული 3, ბმული 4, ბმული 5). საინფორმაციო ბარათის მიხედვით, თინა ბოკუჩავამ განაცხადა: „გულდასაწყვეტია, რომ სააკაშვილი ცდილობდა ბიძინა ივანიშვილი დაემხო და მის მაგივრად მე დამამხო“ (არქივირებული ბმული). ბარათი ტელეკომპანია "მთავარის" ლოგოთი და მის ფეისბუქ-გვერდზე გამოქვეყნებული მასალების დამახასიათებელი ვიზუალით ვრცელდება, რაც გავრცელებულ პოსტს დამატებით დამაჯერებლობას სძენს.

სინამდვილეში, პოლიტიკოსს მსგავსი განცხადება არ გაუკეთებია. აღნიშნული ქარდი „მთავარის“ ქარდის ფოტორედაქტირების პროგრამის საშუალებით დამუშავების შედეგადაა შექმნილი. ფოტოს ორიგინალი ასე გამოიყურება.

სინამდვილეში, თინა ბოკუჩავამ შემდეგი შინაარსის განცხადება გააკეთა: „გულდასაწყვეტია, როდესაც ერთ დღეს ნდობის მანდატს გაძლევს პრეზიდენტი და მეორე დღეს კრიტიკანარევ პოსტებს კითხულობ მისგან... ამაში გარკვეულ როლს თამაშობენ ის კომუნიკატორები, რომლებიც მასთან ყოველდღიურად შედიან.“

შესაბამისად, „ფეისბუქზე“ ვირუსულად გავრცელებული ციტატა გამოგონილია და აუდიტორია შეცდომაში შეჰყავს.