სოციალურ ქსელში შეცდომაში შემყვანი ვიდეო ვრცელდება, თითქოს ინგა გრიგოლია და თორნიკე რაზმაძე კობახიძისა და ზელენსკის შეხვედრას განიცდიან
სოციალურ ქსელ Facebook-სა და TikTok-ზე გავრცელდა ვიდეოები (ბმული 1, 2, 3, 4, 5, 6, არქივირებული ბმული), რომლებშიც თითქოს ჩანს, რომ ხელისუფლების მიმართ კრიტიკულად განწყობილი ჟურნალისტები ან აქტივისტები ირაკლი კობახიძისა და ვოლოდიმირ ზელენსკის შეხვედრაზე წუხან. კერძოდ, რედაქტირებულ ვიდეოებში ჩანან ტვ პირველის ჟურნალისტი ინგა გრიგოლია, რომელიც აცხადებს, რომ შოკშია და სამოქალაქო აქტივისტი თორნიკე რაზმაძე, რომელიც ცრემლებს ვერ იკავებს და ეთერს ტოვებს.
საქართველოს პრემიერ-მინისტრი და უკრაინის პრეზიდენტი სომხეთში 2026 წლის 4 მაისს ევროპული პოლიტიკური გაერთიანების (EPC) მე-8 სამიტის ფარგლებში შეხვდნენ ერთმანეთს. სწორედ აღნიშნულ შეხვედრას მოჰყვა სოციალურ ქსელში მანიპულაციური ვიდეოების გავრცელება.
გავრცელებული ვიდეოს დასაწყისში მოცემული კადრი, სადაც ჟურნალისტი ინგა გრიგოლია აცხადებს, რომ შოკშია, სინამდვილეში 2020 წლის 30 ივნისის გადაცემიდანაა ამოჭრილი. გრიგოლიას საავტორო გადაცემაში "რეაქცია" ტვ პირველის დამფუძნებელი ვატო წერეთელი ერთვება, რომელიც ამერიკის საელჩოში "ქართული ოცნების" წარმომადგენლების მხრიდან მასზე განხორციელებულ თავდასხმაზე საუბრობს. ჟურნალისტის რეაქციაც (იხილეთ 13:09 წუთიდან) აღნიშნულ თავდასხმას უკავშირდება.
რაც შეეხება თორნიკე რაზმაძის ჩართვას, გავრცელებული მონაკვეთი 2025 წლის 5 ოქტომბერს „ტვ პირველის“ ეთერში გასული გადაცემიდან „დღის ამბები“ არის ამოჭრილი (27:55). გადაცემაში თორნიკე რაზმაძე 2025 წლის თვითმმართველობის არჩევნებზე, 4 ოქტომბერს რუსთაველის გამზირზე განვითარებულ მოვლენებზე, ამ დღის საპროტესტო აქციის ორგანიზატორებსა და მათ დაკავებაზე საუბრობს. ამის შემდეგ კი რაზმაძე საზოგადოებას მიმართავს:
„ჩვენ, მინდა, ერთი რამ გავიაზროთ. ჩვენი წინაპრები იბრძოდნენ რუსეთის იმპერიის წინააღმდეგ საუკუნეების განმავლობაში. „დიპ სტეიტს“ არ ებრძოდა წმინდანი პატრიარქი ამბროსი ხელაია. მერაბ კოსტავასა და ზვიად გამსახურდიას გააზრებული ჰქონდათ, რა ბრძოლაში იყვნენ შესული, როცა იატაკქვეშა პროკლამაციებს ბეჭდავდნენ და საბჭოთა კავშირის წინააღმდეგ იბრძოდნენ. ეს ბრძოლა დღეს გადმოვიდა ჩვენზე და ყველამ საკუთარ თავში ჩავიხედოთ, დავიცავით მერაბ კოსტავა ისე, როგორც საჭირო იყო? ზვიად გამსახურდია დავიცავით ჩვენმა ქვეყანამ ისე, როგორც საჭირო იყო? ამბროსი ხელაია დავიცავით?“.
სწორედ აღნიშნული მიმართვის შემდეგ კადრში ჩანს, რომ თორნიკე რაზმაძე ემოციებს ვერ იკავებს და ტირილს იწყებს. წამყვანი ანა ახალაია კი სიტყვით სხვა სტუმართან, გიორგი მელაშვილთან გადადის. მოგვიანებით წამყვანი კითხვით კვლავ უბრუნდება თორნიკე რაზმაძეს: „ეს რისი ცრემლები იყო?“, თორნიკე რაზმაძემ კი ემოციების გამო ვერ შეძლო პასუხი და სტუდია დატოვა. აღსანიშნავია, რომ რაზმაძის ემოციური გამოსვლა გადაცემის გასვლიდან მალევე მანიპულაციური და შეცდომაში შემყვანი ვერსიებით გავრცელდა, რასაც "ჯეოფაქტსი" გამოეხმაურა.
ამდენად, არც ინგა გრიგოლიას განცხადება და არც თორნიკე რაზმაძის ემოციური გამოხმაურება ირაკლი კობახიძისა და ვოლოდიმირ ზელენსკის 4 მაისის სომხეთში გამართულ შეხვედრას არ უკავშირდება.
