სოციალურ ქსელში თეთრ სახლზე რობოტების თავდასხმის AI გენერირებული ვიდეო ვრცელდება
სოციალურ ქსელ Facebook-ში მომხმარებლებმა გაავრცელეს ვიდეოები ( ბმული 1, ბმული 2), რომელზეც ასახულია, როგორ ესხმის თეთრ სახლს რობოტების არმია.
ერთ-ერთ პოსტში მოცემულია შემდეგი მტკიცება: „ჩინელებმა, ხელოვნური ინტელექტის მიერ შექმნეს ვიდეო, თუ როგორ იღებენ თეთრ სახლს ჩინური რობოტები“. მეორე პოსტის მიხედვით, ვიდეო ჩინეთმა გამოაქვეყნა.
სინამდვილეში, აღნიშნული ვიდეოს პირველწყარო უცნობია. შესაბამისად, ფაქტებს არ ეფუძნება მტკიცება, რომ ვიდეო ჩინეთის სახელმწიფო უწყებების მიერ შეიქმნა ან გამოქვეყნდა. ამასთან, მეორე პოსტში საერთოდ გამოტოვებულია ის ფაქტი, რომ ვიდეო ხელოვნური ინტელექტის გამოყენებით არის გენერირებული.
ის რომ აღნიშნული ვიდეო ნამდვილი არ არის, მარტივად გადამოწმებადია. პირველ რიგში ვიდეოს ზედა მარჯვენა კუთხეში ვხედავთ ხატულას, რომელზეც მითითებულია AIGC – ანუ Artificial Intelligence Generated Content - ხელოვნური ინტელექტის მიერ გენერირებული კონენტი. ხატულა იმგვარადაა განთავსებული, რომ დამატებითი განმარტების გარეშე შესაძლოა მომხმარებელმა რომელიმე ტელევიზიის ლოგოდაც კი მიიჩნიოს.
მოცემული ვიდეოს ხელოვნური ინტელექტის გენერირების დადასტურება ვიდეოს ხარისხითაც არის შესაძლებელი. მაგალითად, ვიდეოს დასაწყისში თვითმფრინავიდან პარაშუტით დესანტი ხტება. კადრში ჩანს, რომ მათი პარაშუტები ყავისფერია. როდესაც დესანტი უკვე თეთრი სახლის წინ ქუჩაზე ეშვება, პარაშუტების ფერი შეცვლილია და ის წითელ-თეთრია.
ვიდეოს კიდევ ერთ მონაკვეთში, თეთრი სახლის უკანა მხარეს განთავსებულ კოლონებს ვერტმფრენიდან გასროლილი რაკეტა ხვდება და ინგრევა. ვიდეოს ბოლოს დანგრეული კოლონები თითქმის სრულად აღდგენილია, ხოლო თავდაპირველად გადარჩენილი მოაჯირი პირიქით - დანგრეულია.
ამასთან, თეთრი სახლის უკანა მხარე ასე გამოიყურება - კოლონების ორივე მხარეს ვხედავთ ოთხ-ოთხ ფანჯარას.
ხოლო ვიდეოს ბოლოს თეთრი სახლი „ერთი ფანჯრით უფრო ვიწროა.“
მსგავსი ვიდეოები ვირუსულად სხვა ქვეყნებშიც გავრცელდა და, სავარაუდოდ, ჩინეთში წარმოებული რობოტების საკითხით ასეთი დაინტერესება ჩინურ ახალ წელს გამართულმა ერთ-ერთმა საჩვენებელმა გამოსვლამ გამოიწვია. 2026 წლის ღონისძიებაზე ბავშვებთან ერთად სცენაზე რობოტები გამოვიდნენ და სხვადასხვა საცეკვაო ნომერსა და საბრძოლო ხელოვნებების დემონსტრირებაში მიიღეს მონაწილეობა.
ხელოვნური ინტელექტის გამოყენებით გენერირებულ ვიდეოში მოცემული რობოტების დიზაინი სწორედ ამ გამოსვლაში მონაწილე რობოტების დიზაინს ემთხვევა. როგორც საჯარო წყაროებიდან ირკვევა, რობოტები, რომლებიც ჩინური ახალი წლის აღსანიშნავ ღონისძიებაზე ვიხილეთ, კომპანია უნიტრის (unitree) მიერ არის წარმოებული. კომპანიის ოფიციალური ვებ-გვერდის მიხედვით, ისინი სამი ტიპის ჰუმანოიდ რობოტებს აწარმოებენ - G1, R1 და H2. მათი ფასები 5 900-დან 48 000 აშშ დოლარამდე მერყეობს. ამჟამად კომპანია მხოლოდ სამოქალაქო დანიშნულების ჰუმანოიდ რობოტებს აწარმოებს. ვიდეოში „თეთრ სახლზე თავდამსხმელი“ რობოტები G1 მოდელებია.
ჩინური რობოტების მონაწილეობით გავრცელებული სხვა ვიდეოს ნამდვილობა Deutche Welle-ს ფაქტების გადამმოწმებლებმა გამოიკვლიეს. ამ შემთხვევაში ვიდეოში სამხედრო სწავლებაში მონაწილე რობოტებს ვხედავთ. აღნიშნული ვიდეოც ხელოვნური ინტელექტის მიერ იყო გენერირებული, ხოლო მიუხედავად იმისა, რომ პირველწყარო არც ამ ვიდეოს შემთხვევაშია მიკვლევადი, სოციალურ ქსელებში ვიდეოს გამავრცელები ანგარიშები ამტკიცებდნენ, რომ ვიდეო „ჩინეთმა გაავრცელა“.
ამდენად, ვიდეო ხელოვნური ინტელექტის მიერ გენერირებულია. მტკიცება, რომ ვიდეო „ჩინეთმა გაავრცელა“, არ დასტურდება.
