სოციალურ ქსელში ლალი მოროშკინას რედაქტირებული ვიდეო ვრცელდება
სოციალურ ქსელში გავრცელდა მონაკვეთი "მოროშკინას პოდკასტიდან", რომელშიც წამყვანის, ლალი მოროშკინას მხრიდან მაყურებლისადმი მისალმების პარალელურად ეროტიული ხმები ისმის (დაარქივებული ბმული). ვიდეოს მაყურებლისთვის ისეთი შთაბეჭდილების იქმნება, თითქოს სტუდიაში წამყვანის საუბრის პარალელურად ეროტიული/პორნოგრაფიული ვიდეოა ჩართული. გავრცელებულ ვიდეოს ასევე ადევს გამავრცელებლის ირონიული კომენტარი: "ლალის პოდკასტში რა ხმებია?".
იმის გადასამოწმებლად ნამდვილად ისმოდა თუ არა აღნიშნული ხმები მოროშკინას პოდკასტში, მოვიძიეთ "მოროშკინას პოდკასტის" ამ სერიის თავდაპირველი ჩანაწერი, რომელიც რადიო "იმედის" ფეისბუქ გვერდზე განთავსდა. ლალი მოროშკინას სტუმარი აღნიშნულ სერიაში დავით ქართველიშვილი იყო.
მოსმენისას აშკარაა, რომ პოდკასტის მოჭრილ მონაკვეთში, რომელიც რეალურად დასაწყის ხუთ წამს წარმოადგენს, ფონზე არანაირი ხმა არ ისმის. ამდენად, სოციალურ ქსელში გავრცელებული ვიდეო რედაქტირებულია.
