სოციალურ ქსელში გავრცელებულ ვიდეოში მექსიკელი ქალი და მისი ბრალდებები კანიბალიზმზე ჯეფრი ეპსტინთან დაკავშირებული არ არის
მოკლედ საკითხავი
სოციალურ ქსელში გავრცელდა ახალგაზრდა მექსიკელი ქალის ვიდეო, რომელიც ვიდეოს გამავრცელებლის მიხედვით ეპსტინის კუნძულიდან გაიქცა და კანიბალიზმის ფაქტების შესახებ საუბრობდა.
სინამდვილეში, არ დასტურდება, რომ ახალგაზრდა ქალი ეპსტინის კუნძულიდან გაიქცა ან იქ მომხდარი მოვლენების შესახებ საუბრობდა.
სოციალურ ქსელში ვრცედლება ვიდეო, რომელშიც, აღწერის თანახმად, მექსიკელი მოდელი გაბრიელა რიკო ხიმენესი ჯეფრი ეპსტინის კუნძულიდან გაქცევის შემდეგ კუნძულზე განვითარებულ მოვლენებზე, კერძოდ კი კანიბალიზმზე საუბრობს. აღწერა ასევე მიუთითებს, რომ ხიმენესი პოლიციამ მალევე დააკავა, რის შემდეგაც ის აღარავის უნახავს (არქივირებული ბმული).
პირველ რიგში უნდა აღინიშნოს, რომ გაბრიელა რიკო ხიმენესის შესახებ აღნიშნული ვიდეოს მიღმა ინფორმაცია ინტერნეტში პრაქტიკულად არ მოიპოვება.
YouTube-ზე გაბრიელა რიკო ხიმენესის სახელის ძებნას მივყავართ 2009 წელს ატვირთულ მექსიკურ ღამის ამბების გამოშვებამდე, რომელშიც აღწერილია სოციალურ ქსელში გავრცელებულ ვიდეოში აღბეჭდილი ინციდენტი. მექსიკური არხი Info 7, რომლის ღამის გადაცემაც საუბრობს ხიმენესის ინციდენტის შესახებ, მექსიკის ქალაქ მონტერეიში, ნუევა ლეონის შტატშია ბაზირებული და ძირითადად ამავე ქალაქის სიახლეებს ფარავს. ვიდეოს მოვლენებიც ქალაქ მონტერეის ერთ-ერთ სასტუმროსთან ვითარდება.
სოციალურ ქსელში ვიდეოს მხოლოდ მოკლე მონაკვეთია გავრცელებული. მისი სრული ვერსიის შესწავლით ცხადი ხდება, რომ გაბრიელა რიკო ხიმენესი კანიბალიზმში ბრალს სდებს მექსიკაში ცნობილ გავლენიან ბიზნესმენს და მასთან ასოცირებულ პირებს. ხიმენესის მიერ ნათქვამი სახელის მიხედვით საუბარია ბიზნესმენ კარლოს სლიმ ჰელუზე (Carlos Slim Helú) ან მის ვაჟზე, კარლოს სლიმ დომიტზე (Carlos Slim Domit).
ქალი საუბრობს, რომ ის დატყვევებული იყო და კანიბალიზმის შემთხვევებს ტყვეობისას შეესწრო. ტყვეობის პერიოდი მისი საუბრიდან ცხადი არ არის. ერთ მონაკვეთში ის ამბობს, რომ ეს წელიწადი და 4 თვე გრძელდებოდა. სხვა მონაკვეთში კი საუბრობს, რომ ყველაფერი 2001 წელს დაიწყო. შემთხვევის შესახებ შედარებით ვრცელი სტატია აქვს მომზადებული ბრიტანულ ტაბლოიდ Daily Mail-საც.
გაბრიელა რიკო ხიმენესის თავდაპირველ ისტორიაში არსად ფიგურირებს ჯეფრი ეპსტინის სახელი და არაფერი მიუთითებს იმაზე, რომ მას ეპსტინთან რამე საერთო აქვს. ასევე უნდა ითქვას, რომ საფუძველს მოკლებულია მტკიცება, რომ ხიმენესი ეპსტინის კუნძულიდან გამოიქცა. ვიდეოს მოქმედება მექსიკის ქალაქ მონტერეიში ვითარდება, რომელიც ეპსტინის კუნძულად წოდებული მცირე სენტ ჯეიმსის კუნძულიდან თითქმის 3,500 კილომეტრითაა დაშორებული.
მექსიკურ საინფორმაციო გამოშვებაში ნამდვილად დასტურდება, რომ პოლიცია აკავებს ხიმენესს. თუმცა, გამოშვების ორიგინალი ვიდეოთი არ დასტურდება მისი რაიმე კავშირი ჯეფრი ეპსტინთან.
