თქვა თუ არა იტალიის თავდაცვის მინისტრმა, რომ უკრაინა ომს ვერასდროს მოიგებს?
სოციალურ ქსელში ვრცელდება იტალიის თავდაცვის მინისტრის გვიდო კროზეტოს ციტატა, რომ „უკრაინა ამ ომში გამარჯვებას ვერასდროს შეძლებს.“ (არქივირებული ბმული)
კროზეტომ ეს სიტყვები მართლაც თქვა, თუმცა ინტერვიუს სრული კონტექსტი აჩვენებს, რომ იგი რუსეთის გამარჯვებას გარდაუვლად არ მიიჩნევს და არც უკრაინის კაპიტულაციას ან მისთვის დახმარების შეწყვეტას ემხრობა. პირიქით, მინისტრმა უკრაინის „გამარჯვება“ განმარტა როგორც ქვეყნის გადარჩენა, რუსეთის მიერ დაბომბვის შეწყვეტა და უკრაინის თავისუფალ და დამოუკიდებელ სახელმწიფოდ დარჩენა.
განცხადება კროზეტომ BBC-სთან ინტერვიუში გააკეთა, რომელიც 2026 წლის ოქტომბერში გავრცელდა. მინისტრს ჰკითხეს, შეეძლო თუ არა უკრაინას ომის მოგება. მან უპასუხა: „უკრაინა ამ ომს ვერასდროს მოიგებს“.
თუმცა მისი პასუხი ამ წინადადებით არ დასრულებულა. კროზეტომ განმარტა, რომ უკრაინის გამარჯვებაზე საუბრისას ზოგიერთ ადამიანს შეიძლება წარმოედგინა რუსეთის სრული სამხედრო დამარცხება და პრეზიდენტ ვოლოდიმირ ზელენსკის მოსკოვში უკრაინის დროშით შესვლა. მინისტრის თქმით, ასეთი სცენარი შეუძლებელია.
ამის შემდეგ მან დააზუსტა, რას მიიჩნევს უკრაინის რეალურ გამარჯვებად: რუსეთის გასვლას, დაბომბვის შეწყვეტასა და უკრაინის თავისუფალ ქვეყნად აღდგენას, რომელსაც საკუთარი მომავლის განსაზღვრა შეუძლია.
ინტერვიუს შესახებ გავრცელებულ იტალიურ მედიაგაშუქებაში კროზეტოს პოზიცია ასეა შეჯამებული: მისი მიზანია უკრაინა გადარჩეს და ომი დასრულდეს; უკრაინის გამარჯვება კი რუსეთის მიერ თავდასხმების შეწყვეტასა და ქვეყნის თავისუფლების შენარჩუნებას ნიშნავს.
ამრიგად, კროზეტომ სიტყვები „უკრაინა ამ ომს ვერასდროს მოიგებს“ ნამდვილად გამოიყენა, მაგრამ ამ ფრაზით იგი რუსეთის სრულ სამხედრო დამარცხებას გულისხმობდა. ინტერვიუს მომდევნო ნაწილში მან თავადვე გამოიყენა ტერმინი „უკრაინის გამარჯვება“, ოღონდ განსხვავებული მნიშვნელობით, უკრაინის გადარჩენისა და თავისუფლების შენარჩუნების აღსაწერად.
ინტერვიუს სხვა ნაწილებიც გამორიცხავს ინტერპრეტაციას, თითქოს კროზეტო უკრაინის წინააღმდეგობის გაგრძელებას აზრს მოკლებულად მიიჩნევდა. მან ამერიკის შეერთებული შტატების მიერ უკრაინისთვის სატელიტურ სისტემებსა და სადაზვერვო ინფორმაციაზე წვდომის შეზღუდვა „სრულ და მძიმე შეცდომად“ შეაფასა.
კროზეტოს თქმით, უკრაინის დასუსტება ვლადიმირ პუტინს აფიქრებინებდა, რომ რუსეთის გამარჯვება კვლავ შესაძლებელი იყო და ომის გაგრძელების მოტივაციას გაუზრდიდა. მშვიდობა კი მაშინ გახდებოდა შესაძლებელი, როდესაც პუტინი დარწმუნდებოდა, რომ ფრონტზე ჩიხია და რუსეთს წინსვლა აღარ შეუძლია. მინისტრმა ასევე განაცხადა, რომ იტალია უკრაინის სამხედრო მხარდაჭერას გააგრძელებდა.
მინისტრმა რუსეთის მოქმედებებიც მკაცრად შეაფასა. მისი თქმით, სახელმწიფო, რომელიც სხვა ქვეყნის საზღვარს ტანკებით კვეთს, ბომბავს სკოლებს, საავადმყოფოებსა და ელექტროსადგურებს და მშვიდობიან მოქალაქეებს კლავს, ბოროტებას სჩადის.
BBC-სთვის მიცემული ინტერვიუ კროზეტოს პოზიციის მოულოდნელი ცვლილება არ ყოფილა. 2026 წლის 15 იანვარს იტალიის პარლამენტში გამოსვლისას მან თქვა, რომ არასოდეს მიაჩნდა უკრაინის მიერ რუსეთის სამხედრო დამარცხება რეალისტურ შედეგად. იმავე გამოსვლაში მინისტრმა განმარტა, რომ უკრაინის შეიარაღების მიზანი ომის სამხედრო გზით დასრულება კი არა, ქვეყნისთვის თავდაცვისა და გადარჩენის შესაძლებლობის მიცემა იყო. დიპლომატია მან ომის დასრულების ერთადერთ შესაძლო გზად დაასახელა.
იმავე დღეს იტალიის სენატში კროზეტომ პირდაპირ განაცხადა: „უკრაინის გამარჯვება მისი გადარჩენაა“. მან აღნიშნა, რომ უკრაინის მიღწევა სწორედ ის იყო, რომ რუსეთმა მისი რამდენიმე დღეში ან თვეში დამარცხება ვერ შეძლო და ქვეყანა წინააღმდეგობას აგრძელებდა.
იტალიის სენატმა უკრაინის დახმარების 2026 წლის ბოლომდე გაგრძელებას მხარი დაუჭირა. ოფიციალური გადაწყვეტილება იტალიის მთავრობას უკრაინისთვის სამხედრო აღჭურვილობისა და სხვა დახმარების მიწოდების უფლებას აძლევდა. სენატის შეჯამების თანახმად, კროზეტომ დახმარების შეწყვეტა არა მშვიდობის დაჩქარებად, არამედ უკრაინის კიდევ უფრო დაუცველად დატოვებად წარმოაჩინა.
გავრცელებული პოსტის წაკითხვისას იქმნება შთაბეჭდილება, რომ იტალიის თავდაცვის მინისტრის შეფასებით, უკრაინის დამარცხება გარდაუვალია და წინააღმდეგობას აზრი აღარ აქვს. კროზეტოს სრული მსჯელობა კი ერთმანეთისგან განასხვავებს რუსეთის სრულ სამხედრო დამარცხებას, რომელსაც იგი შეუძლებლად მიიჩნევს, და უკრაინის, როგორც დამოუკიდებელი სახელმწიფოს, გადარჩენას, რასაც მინისტრი უკრაინის შესაძლო და სასურველ გამარჯვებად მოიხსენიებს.
შესაბამისად, მტკიცება, რომ კროზეტომ უკრაინის მიერ ომის მოგება შეუძლებლად მიიჩნია, სიტყვასიტყვით სწორია. თუმცა ამ ციტატის გამოყენება იმის დასამტკიცებლად, რომ მინისტრს რუსეთის გამარჯვება გარდაუვლად მიაჩნია, უკრაინის კაპიტულაციას ემხრობა ან მისთვის დახმარების შეწყვეტას ითხოვს, შეცდომაში შემყვანია.
