სოციალურ ქსელში თორნიკე გოშაძის შესახებ შეცდომაში შემყვანი ინფორმაცია ვრცელდება
სოციალურ ქსელ ფეისბუქში მომხმარებელი აქვეყნებს ვიდეოს - ნაწყვეტს 2025 წლის 5 დეკემბრის ბრიფინგიდან. ბრიფინგზე აქციებზე დაკავებული პატიმრების მშობლებმა მიმართვა გაავრცელეს, რომლითაც 2024 წლის ნოემბერ-დეკემბერში აქციაზე შეკრებილი მოქალაქეების დასაშლელად გამოყენებულ წყლის ჭავლში ქიმიური ნივთიერებების შესაძლო შერევის ფაქტის გამოძიება მოითხოვეს. მოცემული ბრიფინგიდან ნაწყვეტს სოციალური ქსელის მომხმარებელი ხელახლა ავრცელებს და თან ურთავს აღწერას: „პოლიციელების დაწვის ბრალდებით გასამართლებული პატიმრის დედა“.
ვიდეოს ამ კონკრეტულ მონაკვეთში პატიმრების მშობლების საერთო განცხადებას/მიმართვას მარიზი კობახიძე კითხულობს. შესაბამისად, ვიდეოს აღწერა სწორედ მას მიემართება.
მარიზი კობახიძე არის თორნიკე გოშაძის დედა. თორნიკე გოშაძე ერთ-ერთია 2024 წლის ნოემბერ-დეკემბრის აქციებზე დაკავებულთაგან. მისი საქმე სხვა შვიდი პირის საქმესთან ერთად განიხილებოდა. პროკურატურამ დაკავებულებს (ზვიად ცეცხლაძეს, ვეფხია კასრაძეს, ვასილ კაძელაშვილს, ინსაფ ალიევს, თორნიკე გოშაძეს, ნიკოლოზ ჯავახიშვილს, ირაკლი მიმინოშვილსა და გიორგი გორგაძეს) ბრალი 225-ე მუხლით წაუყენა, რაც ჯგუფური ძალადობის ორგანიზებას ან მასში მონაწილეობას გულისხმობდა. მოგვიანებით, სასამართლომ მუხლი გადააკვალიფიცირა - სისხლის სამართლის კოდექსის 226-ე მუხლზე. 226-ე მუხლი გულსიხმობს ჯგუფურ მოქმედებას / მის ორგანიზებას, რომელიც არღვევს საზოგადოებრივ წესრიგს. საბოლოო ჯამში დაკავებულთაგან სამს (ზვიად ცეცხლაძეს, ვეფხია კასრაძესა და ვასილ კაძელაშვილს) ჯგუფური ქმედების ორგანიზებისთვის 2 წლითა და 6 თვით, ხოლო დანარჩენებს ჯგუფურ ქმედებაში მონაწილეობის გამო 2 წლით პატიმრობა მიესაჯათ.
ამდენად, თორნიკე გოშაძეს პოლიციელის დაწვა, პოლიციელის სიცოცხლის ხელყოფა ან მისი მცდელობა არათუ არ ჩაუდენია, არამედ საქართველოს პროკურატურა თავისი თავდაპირველი პოზიციითაც კი არ ედავებოდა მსგავს ბრალდებას. შესაბამისად, ვიდეოს აღწერაში მოცემული მტკიცება რეალობას არ შეესაბამება.
