მცდარია მტკიცება, თითქოს გავრცელებული ვიდეო დუბაიში ირანის თავდასხმით გამოწვეულ კანალიზაციის პრობლემებს ასახავს
მოკლედ საკითხავი
ქართულ ფეისბუქ სივრცეში გავრცელებული ვიდეოს აღწერის თანახმად, ირანის დარტყმის შედეგად დუბაის კანალიზაცია პარალიზებულია.
არ დასტურდება, რომ ირანში მიმდინარე ომის პერიოდში დუბაიში კანალიზაციის პრობლემები იყო.
კადრები სავარაუდოდ ასახავს წვიმის შედეგად გამოწვეულ დატბორვას ქალაქ შარჟაში.
ქართულ ფეისბუქ სივრცეში გავრცელებული ვიდეოს აღწერის თანახმად, ირანის დარტყმის შედეგად დუბაის კანალიზაცია პარალიზებულია. ვიდეოს გამავრცელებელი მიუთითებს, რომ სიტუაციის სირთულის გამო ფეკალმზიდი მანქანები საქმეს ვერ შველიან.
გამოყენებული ვიდეო სოციალურ ქსელ TikTok-იდანაა აღებული, რაც მისი ბოლომდე ნახვისას აშკარა ხდება. ვიდეოს ბოლოს ასევე მითითებულია თავდაპირველი გამავრცელებელი TikTok გვერდის სახელიც. ამ მინიშნებებს მივყავართ თავდაპირველად გავრცელებულ ვიდეომდე, რომლის აღწერაშიც ვხედავთ ე.წ. ჰეშთეგებს, რომლებიც მიგვითითებენ, რომ ვიდეო არაბთა გაერთიანებულ საემიროებს, ქალაქ დუბაის ან შარჟას ასახავს. ვიდეოს კომენტარებში მომხმარებლები აზუსტებენ, რომ კადრები ქალაქ შარჟადანაა.
ღია წყაროებში ინფორმაციის ძიება გვიჩვენებს, რომ 2026 წლის მარტის ბოლო კვირაში არაბთა გაერთიანებულ საემიროებში ძლიერი წვიმები იყო, რამაც რიგი ქალაქების, მათ შორის შარჟას დატბორვა გამოიწვია.
ღია წყაროებში ასევე ვხედავთ ინფორმაციას იმის შესახებ, რომ ქალაქ შარჟაში დატბორვასთან გასამკლავებლად წყლის ტანკერებიანი სატვირთოები გამოიყენეს. სავარაუდოდ, სწორედ ეს პროცესია ასახული ქართულ სოციალურ ქსელში გავრცელებულ ვიდეოში.
ასევე აღსანიშნავია, რომ ღია წყაროებში ძიება ირანის დარტყმის შედეგად დუბაიში კანალიზაციის მწყობრიდან გამოსვლის შესახებ, რაიმე რელევანტურ შედეგებს არ იძლევა.
