სოციალურ ქსელებში ბოლო პერიოდში მასშტაბურად ვრცელდება ინფორმაციები, რომლებიც სირიაში მიმდინარე მოვლენებს ქრისტიანების წინააღმდეგ დაწყებულ მასობრივ დევნად წარმოადგენენ, დასავლეთის ქვეყნებსა და ევროკავშირს კი განზრახ სიჩუმეში ადანაშაულებენ.
მტკიცებებთან ერთად ვრცელდება ძალადობის ამსახველი სხვადასხვა კადრი, რაც მტკიცებების მიხედვით, ქრისტიანების მიმართ წარმოებულ ძალადობას ასახავს, თუმცა კადრების უმრავლესობა ძველია და ისინი 2025 წლის 6-10 მარტს სირიაში მიმდინარე მოვლენებს არ უკავშირდება და არც ქრისტიანების მკვლელობას ასახავს.
რას ასახავს სოციალურ ქსელში გავრცელებული სიკვდილით დასჯის სცენა?
სოციალურ ქსელში Facebook-მომხმარებელმა გამოაქვეყნა ფოტო, სადაც ადამიანების სიკვდილით დასჯის სცენა ჩანს. ფოტოს აღწერის მიხედვით, ფოტო სირიაში მიმდინარე მოვლენებს ასახავს და მასზე ქრისტიანების დახოცვაა ასახული.
„მეორედ მოსვლაა დაწყებული მეგობრებო, ნახეთ ქრისტიანებს როგორ ხოცავენ სირიაში“, — აღნიშნულია პოსტში. აღსანიშნავია, რომ პოსტის ავტორი ევროპას და საფრანგეთის პრეზიდენტ ემანუელ მაკრონს დუმილში ადანაშაულებს.
სინამდვილეში, ვიდეო, რომლიდანაც ფოტო ამოიღეს და სირიაში ამჟამინდელი მოვლენების კონტექსტში 2025 წლის 9 მარტს გაავრცელეს, ძველია და ის ინტერნეტ სივრცეში რამდენიმე წლის წინ გამოჩნდა.
AMN NEW-მა ინფორმაცია, რომელიც ამ კადრებს შეიცავდა, ჯერ კიდევ 2016 წელს გამოაქვეყნა. ამ ინფორმაციაში აღნიშნული იყო, რომ კადრებში სირიაში, ჩრდილოეთ ალეპოში 2013 წელს ჩადენილ სიკვდილით დასჯას ასახავს, რაც სირიის თავისუფლების არმიისა და ჯაბჰატ ალ ნუსრას მიერ ალ-კინდის კიბოს ჰოსპიტლის დაკავებას მოჰყვა.
2014 წელს გამოქვეყნებულ კიდევ ერთ სტატიაში, რომელიც ასევე შეიცავს ამ კადრებს, აღნიშნულია, რომ სიკვდილით დასჯა ISIS-მა განახორციელა, ხოლო ის მამაკაცები, რომლებიც სიკვდილით დასაჯეს, 10 სამხედროა.
2021 წელს ამ ფოტოზე დაყრდნობით გავრცელდა მტკიცება, რომლის მიხედვით კადრები თალიბანის მიერ ადამიანების სიკვდილით დასჯას ასახავდა. ამ მტკიცებას რამდენიმე ფაქტების გადამმოწმებელი ორგანიზაცია გამოეხმაურა, რომლებმაც აღნიშნეს, რომ ვიდეო 2021 წელს არ უკავშირდება და ის ბევრად უფრო ძველია (ბმული 1, 2).
ამდენად, ვიდეო ჯერ კიდევ 2014 წელს გამოქვეყნდა და მტკიცება, რომ ფოტო 2025 წელს სირიაში მოსახლეობის სიკვდილით დასჯას ასახავს, მცდარია.
რას ასახავს ბავშვზე ძალადობის ამსახველი სცენა?
სოციალურ ქსელში ასევე გავრცელდა ვიდეო, სადაც არასრულწლოვან გოგონაზე ძალადობის კადრები ჩანს. პოსტის ავტორი კადრებს სირიაში მიმდინარე მოვლენებს უკავშირებს და ამტკიცებს, რომ კადრებში ასახულ მოვლენას „ევროპა პრაქტიკულად იწონებს“ (დაარქივებული ვიდეო).
„ვიცი, საშინელი კადრებია მეგობრებო – მაგრამ, თქვენც უნდა იცოდეთ – თუ რას ვებრძვით რეალურად ევროკავშირის სახით – აი, რაც ამ ვიდეოში არის გამოსახული – ევროპა პრაქტიკულად იწონებს. საიდან დავასკვენი რომ იწონებს? სანქციები მოუხსნა სირიას, დემოკრატიის გზაზე წარმატებული სვლა მიულოცეს და … “ფულადი ჯილდოები” გადასცეს. არ შეიძლება მაგ ბოროტების სავანის, ევროკავშირის საცეცების შემოსვლა ჩვენს ქვეყანაში“, – აღნიშნულია პოსტში.
სინამდვილეში, ეს ვიდეოც შედარებით ძველია და არ უკავშირდება სირიაში 2025 წლის მარტში განვითარებულ ძალადობრივ დაპირისპირებას აჯანყებულებსა და სირიის ახალ მთავრობას შორის.
კერძოდ, ვიდეოს ძიებას მივყავართ იმ პოსტებამდე, რომლებიც სულ მცირე 2024 წლის სექტემბერში გამოქვეყნდა.
2024 წლის 3 სექტემბერს ახალი ამბების სააგენტოს Hawar News Agency ვებგვერდზე გამოქვეყნდა ინფორმაცია, რომ 15-წამიანი ვიდეო, მამის მიერ ქალიშვილის ცემას ასახავს.
2024 წლის 4 სექტემბერს სირიულმა გამოცემამ გამოაქვეყნა სტატია იმ კადრებზე, რომლებშიც ახალგაზრდა გოგონას დამცირების და ცემის მომენტები ჩანს. სტატიის მიხედვით, კადრები ასახავს თურქეთის მიერ კონტროლირებად სირიის ქალაქ აზიზში, მამის მიერ ქალიშვილის დასჯას იმის გამო, რომ გოგონამ დედა მოინახულა. გამოცემის მიხედვით, მამაკაცმა ვიდეო გადაიღო, როგორც გზავნილი იმ ადამიანების მიმართ, ვინც გოგონას დედის ნახვის საშუალება მისცა.
ის ფაქტი, რომ ფოტოები 2024 წლის 3-4 სექტემბერს გამოქვეყნდა, იმის დამადასტურებელია, რომ კადრები, რომლებიც სოციალურ ქსელში გავრცელდა, 2025 წლის მარტში სირიაში განვითარებულ დაპირისპირებას, რომელსაც სირიის ადამიანის უფლებათა ობსერვატორიის მიხედვით 1400-ზე მეტი ადამიანი ემსხვერპლა, არ უკავშირდება.
ამდენად, ზემოთ მიმოხილული ფოტოები და ვიდეოები, რომელსაც სირიაში ამჟამად მიმდინარე დაპირისპირების ამსახველ კადრებად წარმოადგენდნენ, ამ მოვლენებს სინამდვილეში არ ასახავს. ისინი იქამდეა გადაღებული და გამოქვეყნებული, ვიდრე სირიაში 2024 წლის 8 დეკემბერს ასადის რეჟიმი დაემხობოდა და ძალაუფლებას აჰმედ ალ-შარა აიღებდა.
რა ხდება სირიაში?
სირიას 2000 წლიდან 2024 წლის 8 დეკემბრამდე ბაშარ ალ-ასადი მართავდა, რომელიც ქვეყნის პრეზიდენტის პოზიცია მამამისის, ჰაფეზ ალ-ასადის, გარდაცვალების შემდეგ მიიღო. თავის მხრივ, ჰაფეზ ალ-ასადი სირიის მმართველი 1971 წლიდან იყო. ამდენად, ასადების ოჯახის მმართველობა სირიაში 5 ათწლეულზე მეტს ითვლიდა. აღსანიშნავია, რომ როგორც ჰაფეზ ალ-ასადი, ისე ბაშარ ალ-ასადი ალავიტებს – ისლამურ ეთნო-რელიგიურ ჯგუფს მიეკუთვნებიან. ასადის ოჯახის მმართველობის დროს ალავიტთა ჯგუფი სირიაში პოლიტიკურად დომინირებდა, მიუხედავად იმისა, რომ ისინი სირიის მოსახლეობის დაახლოებით 10%-ს შეადგენენ.
2011 წლიდან სირიაში სამოქალაქო ომი მიმდინარეობდა, რომელსაც სხვადასხვა წყაროს ცნობით, 230 000-დან 620 000-მდე ადამიანი შეეწირა. 2019 წელს გერმანულმა „გლობალური საჯარო პოლიტიკის ინსტიტუტმა“ სირიის სამოქალაქო ომის მიმდინარეობისას ქიმიური იარაღის გამოყენების შემთხვევები შეისწავლა და დაასკვნა, რომ დაფიქსირებული 336 შემთხვევიდან 98% ასადის რეჟიმს უკავშირდება. ქიმიური იარაღის გამოყენებამ ათასობით ადამიანის სიცოცხლე იმსხვერპლა. მათგან ყველაზე მძიმე თავდასხმა 2013 წელს მოხდა, როდესაც დამასკოს გარეუბან ღუტაზე ქიმიური ნივთიერება სარინით მიიტანეს იერიში, რასაც დაახლოებით 1400 ადამიანი ემსხვერპლა. შეტევამ 400 ბავშვის მოწამვლაც გამოიწვია.
2024 წლის 8 დეკემბერს სირიაში ასადების ოჯახის მმართველობა დასრულდა. მისი მმართველობა აჯანყებულებმა დაასრულეს, რომლებსაც ისლამისტი სამხედრო ჯგუფი ჰაიატ ტაჰრირ ალ-შამი (HTS) ლიდერობდა. მათ დაიკავეს სირიის სიდიდით მეორე ქალაქი – ალეპო, შემდეგ გამა და ჰომის ძირითადი კერები. აღმოსავლეთიდან და სამხრეთიდან აჯანყებულების წინსვლასთან ერთად ქვეყნის დედაქალაქი დამასკო აჯანყებულებმა იზოლაციაში მოაქციეს. რამდენიმე საათში კი აჯანყებულებმა დამასკოც დაიკავეს, რასაც სირიის მმართველის, ბაშარ ალ-ასადის, მოსკოვში გაქცევა მოჰყვა.
მას შემდეგ, რაც ასადის რეჟიმი დაემხო და აჰმედ ალ-შარას ხელმძღვანელობით ხელისუფლებაში ისლამისტური გარდამავალი მთავრობა მოვიდა, 2025 წლის ალ-შარას ხელისუფლებას დაქვემდებარებულ უსაფრთხოების ძალებსა და ასადის მომხრეებს შორის მარტში ყველაზე სისხლიანი და ძალადობრივი დაპირისპირება დაიწყო.
ეს დაპირისპირება დასავლეთ სირიაში მდებარე ქალაქებში – ლატაკიასა და ტარტუსში დაიწყო. დასავლეთ სირიაში მდებარე ეს სანაპირო რეგიონი ალავიტი უმცირესობით მჭიდრო დასახლებულ ადგილს წარმოადგენს. აღსანიშნავია, რომ ბაშარ ალ-ასადი, ისევე როგორც მისი მამა, სწორედ ალავიტებს მიეკუთვნებოდნენ და ეს დასახლებები მისი ძალაუფლების მხარდამჭერ კერას წარმოადგენდა.
წყარო: BBC, სირიის დასავლეთ ნაწილი.
საინფორმაციო წყაროები ციტირებენ სირიის სახელმწიფო საინფორმაციო სააგენტო SANA-ს, რომელმაც 6 მარტს ინფორმაცია სირიის სანაპირო რეგიონებში ასადის მომხრეებსა და სამთავრობო ძალებს შორის შეტაკებების შესახებ გაავრცელა. მათი ინფორმაციით, „ასადის მილიციის ჯგუფების ნარჩენები“ თავს დაესხნენ სამთავრობო საგუშაგოებსა და პატრულებს, რასაც სირიის უსაფრთხოების სამსახურის რიგებში მსხვერპლი მოჰყვა.
სირიის თავდაცვის სამინისტროს განცხადებით, თავდასხმები წინასწარ შეთანხმებული და კოორდინირებული იყო, ხოლო საგარეო საქმეთა მინისტრის მრჩევლის განცხადებით, თავდასხმაში 4000-მდე ასადის მხარდამჭერი იყო ჩართული.
ამის საპასუხოდ ალ-შარას ხელისუფლებამ მებრძოლები ქვეყნის მასშტაბით მოაბილიზა, რომლებსაც შეიარაღებული სამოქალაქო პირებიც შეუერთდნენ და ისინი ალავიტებით დასახლებულ სირიის სანაპირო რეგიონებში შევიდნენ.
ასადისა და სირიის ამჟამინდელ მთავრობის მიმართ ლოიალურად განწყობილ ძალებს შორის დაწყებული შეტაკებები მალევე გადაიზარდა კომუნალურ და შურისძიების მკვლელობებში, რასაც რამდენიმე ასეული მშვიდობიანი მოქალაქის დაღუპვა მოჰყვა.
თვითმხილველთა ჩვენებები და CNN-ის მიერ დადასტურებული ვიდეოები აჩვენებს, რომ ხელისუფლების მიმართ კეთილგანწყობილმა პირებმა საველე სიკვდილით დასჯის პროცედურებიც კი განახორციელეს.
გაერთიანებულ სამეფოში დაფუძნებულმა ადამიანის უფლებათა სირიული ქსელის (SNHR) აღმასრულებელმა დირექტორმა 10 მარტს განაცხადა, რომ 779 მოკლულს შორის, ასადის მიმართ ლოიალურად განწყობილი შეიარაღებული ჯგუფები პასუხისმგებელნი არიან 383 ადამიანის სიკვდილზე, მათ შორის სახელმწიფო უსაფრთხოების ძალების 172 წევრზე და 211 სამოქალაქო პირზე. რაც შეეხება სამთავრობო ძალებს და მათთან დაკავშირებულ ჯგუფებს, რომლებიც როგორც სირიელ, ასევე უცხოელ მოქალაქეებს მოიცავდა, ისინი პასუხისმგებელნი არიან სულ მცირე 396 ადამიანის დაღუპვაზე, მათ შორის „სამოქალაქო და განიარაღებული მებრძოლების“ ჩათვლით. განცხადებაში აღნიშნული იყო, რომ ასადის მომხრე შეიარაღებულ დაჯგუფებაში მოკლული მებრძოლების რაოდენობა ამ მონაცემებში არ შედის (დაარქივებული ბმული).
გავრცელებული ინფორმაციის მიხედვით, სირიის უსაფრთხოების ძალების მიერ მშვიდობიანი მოსახლეობისა და პატიმრების უკანონო მკვლელობების უმეტესი ნაწილი ჩაიდინეს შეიარაღებულმა სამოქალაქო პირებმა, რომლებიც სამხედრო კოლონებს შეუერთდნენ და უსაფრთხოების ძალების ორმა დანაყოფმა – აბუ ამშამ და ჰამზატმა, რომლებიც აჯანყებულ მხარეს მიეკუთვნებოდნენ და რომლებიც აფილირებულები იყვნენ თურქეთის მხარდაჭერილ სირიის ეროვნულ არმიასთან (Syrian National Army). ორივე ფრაქცია და მათი ლიდერები ადამიანის უფლებების სავარაუდო სერიოზული დარღვევის გამო აშშ-ს სანქციების ქვეშ არიან. გავრცელებული ინფორმაციის მიხედვით, მიუხედავად იმისა, რომ ისინი სახელმწიფოს ეგიდით მოქმედებენ, მათზე სახელმწიფოს ჯერჯერობით შეზღუდული კონტროლი აქვს.
სირიის ადამიანის უფლებათა ობსერვატორიის 9 მარტის განცხადების მიხედვით, მათ დააფიქსირეს 973 მშვიდობიანი მოქალაქის მოკვლა მასობრივი ხოცვის 39 შემთხვევაში და სხვა ინდივიდუალური სიკვდილით დასჯის შემთხვევებში, რომლებიც მათი თქმით, ჩაიდინეს სამხედრო და უსაფრთხოების ძალებმა სირიის სანაპირო ზოლსა და ლატაკიის მთებში. სირიის ადამიანის უფლებათა ობსერვატორიის მიხედვით, დაღუპულთა რიცხვი 1400-ზე მეტია, თუ ამ სტატისტიკაში, მშვიდობიანი მოქალაქეების გარდა, შეტაკებების შედეგად დაღუპულ 231 უსაფრთხოებისა და თავდაცვის სამსახურის წარმომადგენელსა და 250 ალავიტ მებრძოლსაც განვიხილავთ.
ჟენევაში გაეროს ადამიანის უფლებათა ოფისის (OHCHR) პრესსპიკერმა თამინ ალ-ხითანმა სირიაში შექმნილ ვითარებაზე ისაუბრა და განაცხადა, რომ მათ მიერ დადასტურებულია 111 ადამიანის მკვლელობა, თუმცა ისიც განმარტა, რომ დაღუპულთა რიცხვი ბევრად მეტია. ამ დადასტურებული შემთხვევებიდან ბევრი წარმოადგენს სამართლიანი სასამართლოს გარეშე დაუყოვნებლივ სიკვდილით დასჯის შემთხვევებს, რომლებიც სექტანტურ საფუძველზე განხორციელდა. გავრცელებული ინფორმაციით, ეს უსაფრთხოების ძალების მხარდამჭერ ამოუცნობ შეიარაღებულ პირებსა და ჯგუფებს და ასადთან ასოცირებულ ჯგუფებს უკავშირდებათ. გაეროს ადამიანის უფლებათა ოფისის მიერ შეგროვებული ჩვენებების მიხედვით, დამნაშავეები, რომლებიც იჭრებოდნენ სახლებში, მოსახლეობას ეკითხებოდნენ, ისინი ალავიტები იყვნენ თუ სუნიტები, სანამ მათ სიკვდილით დასჯას ან დანდობას გადაწყვეტდნენ.
2025 წლის 8 მარტს სირიის ქრისტიანი პატრიარქების საერთო განცხადებაში აღნიშნული იყო, რომ „ქრისტიანული ეკლესიები – მიუხედავად იმისა, რომ მკაცრად აკრიტიკებენ ნებისმიერ ქმედებას, რომელიც საფრთხეს უქმნის სამოქალაქო მშვიდობას – გმობენ უდანაშაულო მშვიდობიანი მოსახლეობის მიმართ ხოცვა-ჟლეტას და მოწოდებას ავრცელებენ ამ საშინელი ქმედებების დაუყოვნებლივი შეწყვეტისთვის, რომლებიც მკვეთრად ეწინააღმდეგება ყველა ადამიანურ და მორალურ ღირებულებას” (დაარქივებული ბმული). საყურადღებოა, რომ სოციალურ ქსელში გავრცელებული მტკიცებების საპირისპიროდ, რომ სირიაში „ქრისტიანების მათი რელიგიური ნიშნით ხოცვა და გენოციდი“ მიმდინარეობს, აღნიშნულზე არ საუბრობს თავად ქრისტიანული ეკლესიების განცხადება. ამის საპირისპიროდ, განცხადებაში მშვიდობიანი მოქალაქეების მკვლელობაა დაგმობილი.
ქრისტიანთა მიმართ განზრახ განხორციელებული მკვლელობების სერიის შესახებ მტკიცებებს გამოეხმაურა გამოცემა La Croix, რომელიც კათოლიკური გაზეთია და რომელიც ინფორმაციას რელიგიურ საკითხებზე აქვეყნებს (დაარქივებული ბმული). სტატიაში სათაურით „იყვნენ, თუ – არა ქრისტიანები სირიის სასიკვდილო დარბევისას სამიზნე?“, გაზეთი აღნიშნავს, რომ დაპირისპირებას და შეტაკებებს დაახლოებით 1000 მშვიდობიანი მოქალაქე ემსხვერპლა, რომელთა უმრავლესობა ალავიტების რელიგიურ უმცირესობას მიეკუთვნებოდა. გაზეთი იმასაც აღნიშნავს, რომ 6-დან 10 მარტამდე პერიოდში მიმდინარე დაპირისპირებას, გავრცელებული ინფორმაციით, ალავიტებთან და სუნიტებთან ერთად ქრისტიანთა სიცოცხლეც ემსხვერპლა. გამოცემა წერს, რომ ორგანიზაციის „Aid to the Church in Need (ACN) წყარომ განაცხადა, რომ ლატაკიის ევანგელისტური ეკლესიის წევრი მამა-შვილი ქალაქ ბანიასში „მანქანაში გააჩერეს და მოკლეს, მღვდლის მამასთან ერთად“. ამასთანავე, წყაროს ინფორმაციით, „სახლები და მანქანები გაძარცვეს, რაც გავლენას მოახდენდა ყველაზე, მათ შორის ქრისტიანებზეც“.
გამოცემაში აღნიშნულია, რომ სირიის კათოლიკური ეკლესიის არქიეპისკოპოსმა ჟაკ მურადმა განაცხადა, რომ „ქრისტიანებს ხოცავდნენ არა იმიტომ, რომ ქრისტიანები იყვნენ, არამედ იმიტომ, რომ ალავიტების უბნებში ცხოვრობდნენ. ისინი იყვნენ არაპირდაპირი მსხვერპლნი“. ეპისკოპოსის გამოთვლებით, დაახლოებით 12 ქრისტიანი დაიღუპა. „გავრცელებული ინფორმაციით, რამდენიმე ისმაილიელიც დაიღუპა. მაგრამ იმის თქმა, რომ მთავრობა კონკრეტულად ქრისტიანებს იღებს მიზანში, არაზუსტია და შეიძლება ისინი შემდგომი რისკის ქვეშ დააყენოს“, – განაცხადა მან.
ვინსენტ გელოტმა, რომელიც სირიასა და ლიბანში აღმოსავლელი ქრისტიანების კათოლიკური დახმარების ორგანიზაციის პროექტების მენეჯერია, განაცხადა, რომ „ბოლო დღეებში ქრისტიანთა ხოცვა-ჟლეტა არ მომხდარა, მაგრამ იყო ალავიტების მასობრივი მკვლელობები“. მისი გამოთვლებითაც, მოკლულ ქრისტიანთა რაოდენობა 10-მდეა.
ამდენად, მტკიცება, რომ სირიაში 6-დან 10 მარტამდე მიმდინარე მასობრივი მკვლელობები ქრისტიანების წინააღმდეგ იყო მიმართული, ამ ეტაპზე საჯარო წყაროებით არ დასტურდება. წყაროების მიხედვით, მოკლული მშვიდობიანი მოსახლეობის უმრავლესობა ალავიტები არიან.
სირიის გარდამავალი მთავრობის დროებითმა პრეზიდენტმა აჰმედ ალ შარამ 10 მარტს Reuters-თან ინტერვიუში ამ დაპირისპირებაზე ისაუბრა. მან სისხლისღვრის დაწყებაში „უცხოელების მიერ ზურგგამაგრებული“ ასადის მომხრე ჯგუფები დაადანაშაულა, თუმცა ისიც აღიარა, რომ ამას შურისძიების მკვლელობები მოჰყვა. მან ასევე აღნიშნა, რომ „ჩვენ ვიბრძოდით დაჩაგრულთა დასაცავად და არ მივიღებთ იმას, რომ სისხლი უსამართლოდ დაიღვაროს ან ეს დასჯის და პასუხისმგებლობის გარეშე მოხდეს, თუნდაც [ჩვენთან] ყველაზე ახლოს მყოფების მიმართ“.
აჰმედ ალ-შარამ ორი კომისიის შექმნის შესახებ განაცხადა. პირველმა ორგანომ, რომელიც მოიცავს ალავიტებს, ჩადენილი მკვლელობები 30 დღის განმავლობაში უნდა გამოიძიოს და დამნაშავეები პასუხისგებაში მისცეს. მეორე კომიტეტის შექმნის გაცხადებული მიზანი სამოქალაქო მშვიდობისა და შერიგების შენარჩუნებაა.
სირიაში არსებულ ვითარებას საერთაშორისო გამოხმაურება მოჰყვა.
გაეროს გენერალური მდივნის ანტონიო გუტერეშის პრესსპიკერმა საზოგადოებას გენერალური მდივნის პოზიცია გააცნო და აღნიშნა, რომ მან გამოხატა ღრმა შეშფოთება ძალადობრივი ესკალაციის გამო, განსაკუთრებით უკანონო მკვლელობების შესახებ ცნობების გამო, რომელსაც მათ შორის მთელი ოჯახების დაღუპვა მოჰყვა.
Unicef-ის ახლო აღმოსავლეთისა და ჩრდილოეთ აფრიკის რეგიონული დირექტორის ედუარდ ბეგბედერი ასევე გამოეხმაურა სირიაში მიმდინარე შემაშფოთებელ დაპირისპირებას და აღნიშნა: „UNICEF ღრმად შეშფოთებულია მიმდინარე ძალადობის ტალღით სირიის სანაპირო რეგიონებში, რომელმაც გავრცელებული ინფორმაციით, სულ მცირე 13 ბავშვის, მათ შორის 6 თვის ბავშვის სიცოცხლე შეიწირა“. მან შერიგების და მშვიდობიანი პოლიტიკური ტრანზიციის მოწოდებაც გაავრცელა.
აშშ-ის სახელმწიფო მდივანმა, მარკო რუბიომ, დაგმო „რადიკალი ისლამისტი ტერორისტები“, სირიის დროებით ხელისუფლებას სისხლისღვრის ჩადენაში პასუხისმგებელი პირების პასუხისგებაში მიცემისკენ მოუწოდა და განაცხადა, რომ „შეერთებული შტატები დგას სირიის რელიგიურ და ეთნიკურ უმცირესობებთან, მათ შორის ქრისტიანებთან, დრუზებთან, ალავიტებთან და ქურთებთან და თანაგრძნობას უცხადებს მსხვერპლებსა და მათ ოჯახებს“.
ევროკავშირის წარმომადგენელმა კი განაცხადა, რომ „ევროკავშირი კატეგორიულად გმობს ბოლო თავდასხმებს, რომლებიც გავრცელებულია ასადის მომხრე ელემენტების მიერ, დროებით სამთავრობო ძალებზე სირიის სანაპირო რაიონებში და ყველა ძალადობას მშვიდობიანი მოსახლეობის წინააღმდეგ“. ევროკავშირმა საერთაშორისო ჰუმანიტარული სამართლის სრული დაცვით. ყველა ვითარებაში სამოქალაქო პირების დაცვის მოწოდებაც გაავრცელა.
სირიაში დაწყებულ დაპირისპირებას ასევე გამოეხმაურნენ ცალკეული ევროპული ქვეყნებიც. მაგალითად, საფრანგეთმა 8 მარტს დაგმო სირიაში არსებული ძალადობა, რომელიც მიზანში „მშვიდობიან მოსახლეობას, მათი რწმენის გამო, და პატიმრებს“ იღებდა. საფრანგეთის საგარეო საქმეთა სამინისტრომ მოუწოდა სირიის ახალ ხელისუფლებას „უზრუნველყოს, რომ დამოუკიდებელმა გამოძიებამ ნათელი მოჰფინოს ამ დანაშაულებს და დამნაშავეების დაისაჯონ“.
„ჩვენ ვგმობთ ძალადობის გავრცელებას სირიის ტარტუსში, ლატაკიასა და ჰომსში. ცნობები მშვიდობიანი მოსახლეობის და პატიმრების მკვლელობის შესახებ შოკისმომგვრელია. გარდამავალ მთავრობას ეკისრება პასუხისმგებლობა, თავიდან აიცილოს შემდგომი თავდასხმები, გამოიძიოს ინციდენტები და პასუხისმგებელ პირებს პასუხისმგებლობა მოსთხოვოს. ჩვენ სასწრაფოდ მოვუწოდებთ ყველა მხარეს, ბოლო მოეღოს ძალადობას” – აღნიშნულია გერმანიის საგარეო საქმეთა სამინისტროს განცხადებაში.
