სოციალურ ქსელში Facebook-გვერდი ჟურნალისტ ნინია კაკაბაძის ვიდეოს ავრცელებს (დააარქივებული ბმული). ჟურნალისტი ვიდეოში ამბობს: „შვილი გავაჩინე ეს არის ყველაზე დიდი შეცდომა, რაც ცხოვრებაში დამიშვია, მარტო ამისათვის უნდა გასამართლდეს ყველა, ვინც ეს ნორმად დაადგინა. ასე რომ არავითარ შემთხვევაში ეს შეცდომა არ დაუშვათ“. Facebook-გვერდი აღწერაში უთითებს „მგონი ნაადრევ ქორწინებაზე ამბობს, რომ შეცდომააო“, თუმცა კომენტარების მიხედვით, აშკარაა, რომ მომხმარებლები ვიდეოს შეცდომაში შეჰყავს. რეალურად, ინტერვიუდან კადრები იმგვარად არის მოჭრილი, რომ ნინია კაკაბაძის ნათქვამს დამახინჯებულად წარმოაჩენს. სრულ ინტერვიუში, ნინია კაკაბაძე ადრეულ ასაკში დაქორწინებაზე საუბრობს და სინანულს სწორედ ადრეულ ასაკში ქორწინებაზე და არა შვილების გაჩენასთან დაკავშირებით გამოხატავს.
ვიდეოს კომენტარებში მომხმარებლები წერენ: „ხო არ ღადაობ. რა არის შენი ცხოვრება შვილის გარეშე. ღმერთო გადმოხედე ამისთანებს“; „შენ ხარ შეცდომა შენი მშობლების“; „ასეთებს რო აპიარებთ იმიტომ მოდის გაბოროტებული თაობა. ეს სტუდიაში კიარა ფსიქიატრიულში უნდა მიგეწვიათ“. შესაბამისად, ვიდეოს, მიუხედავად აღწერისა, რომელშიც ასევე დაზუსტებით არ წერია, რომ ნინია კაკაბაძე რეალურად ნაადრევ ქორწინებაზე საუბრობს, მომხმარებლები შეცდომაში შეჰყავს.
ვიდეოს მონაკვეთი ტელეკომპანია ფორმულას გადაცემიდან „მე-17 სართული“ არის აღებული, რომელიც ეთერში 2023 წლის 14 ოქტომბერს გავიდა და იძულებით ქორწინებას, პედოფილიას, სექსუალური ძალადობას ეხებოდა. ნინია კაკაბაძე „მე-17 სართულის“ თანაწამყვანია. გადაცემის ერთ-ერთი სტუმარი ჩინარა კოჯაევა იყო, იურიდიული ფაკულტეტის სტუდენტი, რომელიც ძალით გათხოვებას ორჯერ, 14 და 17 წლის ასაკში, გადაურჩა.
ნინია კაკაბაძე სწორედ ჩინარა კოჯაევას მიმართავს მონაკვეთში, რომელიც შემდეგ სოციალურ ქსელში გავრცელდა (იხილეთ ბმულზე 49:15 წუთიდან) : „ძალიან დიდი მადლობა, ბევრი ჩინარა გვჭირდება და მე დარწმუნებული ვარ, ძალიან მალე გვეყოლება ეს ბევრი ჩინარა. ის, რაც შეძლო ჩინარამ, მე ვერ შევძელი. 16 წლის ასაკში მე გავთხოვდი, 17 წლის ასაკში შვილი გავაჩინე, ეს არის ყველაზე დიდი შეცდომა, რაც ცხოვრებაში დამიშვია, რომლის გამოსწორებაც შემდეგ იყო შეუძლებელი“. იმიტომ არა, რომ ჩემი მაშინდელი მეუღლე რამით ცუდი იყო, ძალიან კარგი ადამიანია, დღესაც ძალიან მიყვარს და ჩვენ დღეს მეგობრები ვართ. მყავს შვილი, ასევე მეგობრები ვართ დღეს. ამაში არ არის საქმე. უბრალოდ, 16 წლის ასაკში გათხოვება იყო დანაშაული და მე ამ დანაშაულის ჩადენისგან არავინ არ შემაჩერა და აღმოვჩნდი ჩემდა უნებურად, იმიტომ რომ ვიყავი პატარა, სულელი გარკვეულწილად. აღმოვჩნდი აი ასეთი მსხვერპლი, ამ საყოველთაოდ გამეფებული დანაშაულის, რომელიც 90-იან წლებში მართლაც ნორმად ითვლებოდა. მარტო ამისათვის უნდა გასამართლდეს ყველა, ვინც ეს ნორმად დაადგინა ბნელ 90-იანებში. ასე, რომ არავითარ შემთხვევაში ეს შეცდომა არ დაუშვათ“.
ამდენად, გავრცელებულ ვიდეოში ორი სხვადასხვა მონაკვეთი ისეა შეერთებული, რომ მომხმარებელი შეცდომაში შეჰყავს და აფიქრებინებს, რომ ჟურნალისტი სინანულს შვილების გაჩენის გამო გამოთქვამს. კერძოდ, მონაკვეთი, რომელშიც ჟურნალისტი შვილის გაჩენაზე საუბრობს, წყდება და მას იმავე გადაცემიდან სხვა მონაკვეთი ებმის, რომელშიც ამბობს, რომ უნდა გასამართლდეს ყველა, ვინც ეს ნორმად დაადგინა და მოუწოდებს სხვებს, ასეთი შეცდომა არ დაუშვან. სინამდვილეში, ნინია კაკაბაძემ გადაცემაში სინანული არა შვილების გაჩენის გამო, არამედ ადრეულ ასაკში ქორწინებაზე გამოთქვა.
