სოციალურ ქსელში ჩეხეთის პრეზიდენტ, პეტრ პაველის შემდეგ ციტატას ავრცელებენ: „უკრაინას გამარჯვების შანსი უკვე 2023 წელს არ ჰქონდა. პირველი კონტრშეტევის დროს. წარმატებული შეტევისთვის აუცილებელია ძალების ბალანსი მინიმუმ 3:1 და სასურველია 5:1, თუმცა ძალების ბალანსი უკრაინასა და რუსეთს შორისაც კი იყო რუსეთის სასარგებლოდ. უკრაინას მოუწევს „აღიაროს ის რეალობა, რომელიც არსებობს“. პოსტი 2025 წლის 23 მარტსაა გამოქვეყნებული და დამატებით აღნიშნულია, რომ ამ განცხადებამდე 3 დღით ადრე პეტრ პაველმა შემდეგი რამ თქვა: „უკრაინა ამ ომს იგებს, რუსეთს შანსი არ აქვს“. სინამდვილეში, ჩეხეთის პრეზიდენტის ციტატა უკრაინის კონტრშეტევასთან დაკავშირებით სრულად არ არის მოცემული, რაც მის განცხადებას კონტექსტს უცვლის.
2025 წლის 22 მარტს ჩეხეთის პრეზიდენტმა European Pravda-სთან საუბრისას შემდეგი განცხადება გააკეთა: „ჯერ კიდევ მაშინ, როცა უკრაინამ ორი წლის წინ დიდი კონტრშეტევა დაიწყო, ის არ იყო კარგად აღჭურვილი რეალური წარმატებისთვის. სამხედრო თეორია ამბობს, რომ წარმატებული შეტევისთვის საჭიროა ძალების შეფარდება მინიმუმ 3:1 ან უკეთეს შემთხვევაში 5:1, და იმ დროისთვის უკრაინისა და რუსეთის ძალების შეფარდება ჯერ კიდევ რუსეთის სასარგებლოდ იყო. ამიტომ ნათელი იყო, რომ კონტრშეტევა იმდენად წარმატებული ვერ იქნებოდა, რომ ყველა ტერიტორია გაეთავისუფლებინათ. ახლა აქ ვართ, და ვფიქრობ, რაც უნდა გავაკეთოთ, ეს არის უკრაინის მხარდაჭერა ისეთ დონეზე, რომ მან შეძლოს შეინარჩუნოს თავისი ტერიტორიები, არ დაკარგოს კიდევ უფრო მეტი და ძალიან მალე შექმნას პირობები ცეცხლის შეწყვეტისა და შემდგომი მშვიდობისთვის“. კონფლიქტის დასრულებასთან დაკავშირებით, პრეზიდენტმა განაცხადა, რომ თვლის, ეს კონფლიქტი კომპრომისით გადაწყდება: „თუმცა, მჯერა, რომ კომპრომისი არ უნდა ნიშნავდეს ოკუპირებული ტერიტორიების რუსეთის საკუთრებად აღიარებას, არამედ რეალობის აღქმას, რომ უკრაინის ნაწილი ამჟამად და გარკვეული დროით დროებით ოკუპირებული იქნება რუსეთის მიერ“, – თქვა ინტერვიუში პეტრ პაველმა.
საგულისხმოა, რომ მთელი ინტერვიუს განმავლობაში პეტრ პაველი არსად ამბობს ფრაზას, რომ „უკრაინას მოუწევს „აღიაროს ის რეალობა, რომელიც არსებობს“. გარდა ამისა, პოსტში არსებული მტკიცება, თითქოს „სამი დღის წინ“ ჩეხეთის პრეზიდენტს რადიკალურად განსხვავებული მოსაზრება ჰქონდა – მცდარია. პეტრ პაველის განცხადება მსგავსი ფორმულირებით სანდო მედიების ვებგვერდებზე ან მის ოფიციალურ X-ის ანგარიშზე არ იძებნება. ამასთან, Facebook-ზე გავრცელებული პოსტი არ უთითებს წყაროს და არ აკონკრეტებს, სად გააკეთა ჩეხეთის პრეზიდენტმა მსგავსი განცხადება.
გარდა ამისა, European Pravda-სთან ინტერვიუმდე რამდენიმე დღით ადრე, 2025 წლის 18 მარტს, პეტრ პაველი მიუნხენის კონფერენციაზე სიტყვით გამოვიდა. მიმართვაში პეტრ პაველს იდენტური ან შინაარსობრივად მსგავსი ფრაზა არსად უხსენებია.
„ჯეოფაქტსი“ ინფორმაციის გადასამოწმებლად ჩეხ კოლეგებსაც დაუკავშირდა, რომლებმაც დაგვიდასტურეს, რომ ჩეხეთის პრეზიდენტის მსგავსი ციტატა არც ჩეხურ მედიაში იძებნება.
შესაბამისად, გავრცელებული პოსტის ერთი ნაწილი მანიპულაციურია, ხოლო მეორე, რომლის თანახმადაც, თითქოს ჩეხეთის პრეზიდენტმა განაცხადა, რომ უკრაინა ომს იგებს და რუსეთს შანსი არ აქვს, ყალბია.
