სოციალურ ქსელში Facebook-მომხმარებელი Davit Tordia, რომლის მიერ გავრცელებული დეზინფორმაცია „ჯეოფაქტსს“ წარსულშიც გადაუმოწმებია, ავრცელებს ფოტოს (დაარქივებული ბმული), რომელზეც საქართველოს მესამე პრეზიდენტ, მიხეილ სააკაშვილსა და რუსეთის პრეზიდენტ ვლადიმერ პუტინს ხელი-ხელ ჩაკიდებულებს ვხედავთ. სინამდვილეში, ფოტო ყალბია და სავარაუდოდ, ხელოვნური ინტელექტის მიერაა გენერირებული.
პირველ რიგში, აღსანიშნავია, რომ მიხეილ სააკაშვილისა და ვლადიმერ პუტინის შეხვედრის მსგავსი ფოტო არ გავრცელებულა არც ერთ სანდო მედიასა თუ საჯარო წყაროში. აღნიშნული ფოტო არც ფოტოს ძიების ინსტრუმენტით (reverse image search) იძებნება, რაც მიუთითებს, რომ იგი, პოსტის ავტორის სოციალური ქსელის გარდა, სავარაუდოდ, არსად გამოქვეყნებულა.
დამატებით, ფოტოს რამდენიმე დეტალი მიუთითებს, რომ იგი, სავარაუდოდ, ხელოვნური ინტელექტითაა გენერირებული. მაგალითად, ფოტოზე არაბუნებრივადაა გამოსახული ვლადიმერ პუტინის თითები. კერძოდ, მარჯვენა ხელზე თითები არაბუნებრივადაა ჩაღრმავებული და თითქოს შუაში წყდება, მარცხენა ხელზე კი თითებსა და ფრჩხილებს შორის კონტური წაშლილია და არაბუნებრივად უერთდება ერთმანეთს. ამასთანავე, მარცხენა ხელზე თითების რაოდენობაც ხელოვნურ ინტელექტზე მიუთითებს. უფრო კონკრეტულად, დაკვირვების შედეგად აღიქმება, რომ პუტინს მარცხენა ხელზე 6 თითი აქვს: მათგან 5 ზედაპირზევე ჩანს და ისინი შედარებით გრძელი თითებია, მე-6 თითი ფოტოზე არ ჩანს, თუმცა ლოგიკურია, რომ ცერა თითს წარმოადგენს, რომლითაც პრეზიდენტი პუტინი პრეზიდენტ სააკაშვილის თითებს ეჭიდება.
ამასთანავე, ყურადღებას იქცევს ასევე პრეზიდენტების თვალები. კერძოდ, თითქოს ორივეს თვალის ბუდეში სიცარიელე აქვს, რის გამოც ისინი არა ერთმანეთის, არამედ სხვადასხვა მხარეს იყურებიან.
ამრიგად, ფოტო ყალბია და სავარაუდოდ, ხელოვნური ინტელექტის მიერაა გენერირებული.
