Facebook-ანგარიშები (1, 2) პოსტს ავრცელებენ (დაარქივებული ბმული), რომლის მიხედვითაც, ისრაელმა შესაძლოა მიიღოს კანონი, რომლის მიხედვითაც ქრისტიანებს, რომლებიც იესოზე ისაუბრებენ, ციხეში ჩასვამენ: „იესოზე საუბარს შეიძლება მოჰყვეს ორ წლამდე თავისუფლების აღკვეთა, ეს ეხება 18 წლამდე ბავშვებს. იესოს შესახებ მასალის გამოქვეყნება ისჯება ერთ წლამდე თავისუფლების აღკვეთით. კანონი, თუ განხორციელდება, შეიძლება სერიოზული კონფლიქტი გამოიწვიოს მთელ მსოფლიოში ქრისტიანებში ეს ერი დასასრულისკენ მიდის“, – ვკითხულობთ ერთ-ერთი პოსტის აღწერაში. რეალურად, ანგარიშების მიერ გავრცელებულ სიუჟეტში 2023 წლის პროცედურულად დარეგისტრირებულ კანონპროექტზეა საუბარი, რომლის ავტორებსაც კი არ ჰქონდათ მიზნად მისი მიღება. კანონპროექტის განხილვაც მოგვიანებით შეჩერდა. ამჟამად, ისრაელში მსგავსი კანონპროექტი ან კანონი არ არსებობს.
ისრაელის პარლამენტს ორმა ულტრამემარჯვენე პარტიის წევრმა, 2023 წლის 9 იანვარს კანონპროექტი წარუდგინა. კანონპროექტი – მიღების შემთხვევაში, რელიგიის ქადაგებას, სხვისი რელიგიის შეცვლის მიზნით, კრძალავდა. კანონპროექტში, რომლის ავტორები დეპუტატები მოშე გაფნი და იაკოვ აშერი არიან, ნათქვამია: „ვინც ეცდება, დაარწმუნოს პირი პირდაპირ, ციფრული გზით, ელექტრონული ფოსტით ან ინტერნეტით, რომ შეიცვალოს თავისი რელიგია, დაისჯება ერთი წლით თავისუფლების აღკვეთა, ხოლო თუ ქადაგება არასრულწლოვანის მიმართ ხორციელდება, ამ შემთხვევაში სასჯელი ორი წელი იქნება“.
კანონპროექტმა მღელვარება გამოიწვია, განსაკუთრებით ქრისტიანების მხრიდან, თუმცა, მისმა ინიციატორმა, მოშე გაფნიმ აღნიშნა, რომ კანონპროექტი პროცედურულად დაარეგისტრირა და გამიზნული არც იყო მისი მიღება. მოგვიანებით, ისრაელის პრემიერ-მინისტრმა, ბენიამინ ნეთანიაჰუმ განაცხადა, რომ ისინი არ აპირებენ, ქრისტიანობის წინააღმდეგ კანონი მიიღონ. კანონპროექტის განხილვა მალევე შეწყდა.
აღსანიშნავია, რომ Facebook-ანგარიშები ინფორმაციის წყაროდ ამერიკული გამოცემა Newsmax-ის სიუჟეტს ავრცელებენ. თუმცა, სიუჟეტი ძველია, კერძოდ, 2023 წლის მარტში გამოქვეყნდა სათაურით: „ინიციირებული კანონპროექტი აკრძალავს იესოზე ლაპარაკს ისრაელში“ და ზემოთ განხილულ კანონპროექტს ეხებოდა. დამატებით, ისიც უნდა აღინიშნოს, რომ გამოცემა Newsmax-ი Media Bias/Fact Check-ის (გამოცემა, რომელიც მედიის მიკერძოებულობისა და მცდარი/ყალბი ახალი ამბების შესახებ საზოგადოების ინფორმირებას ემსახურება) თანახმად, ყალბ ამბებს ხშირად ავრცელებს და არასანდო წყაროდ ითვლება.
