სოციალურ ქსელში Facebook-ანგარიში ავრცელებს ფოტოს (დაარქივებული ბმული), რომელზეც კაბაში ჩაცმულ მამაკაცს ვხედავთ. ფოტოს თან ახლავს აღწერა: „ეს სათნოება ღამეებს ათენებს ჩვენზე ფიქრში. ევროპარლამენტი ქმნის საგამოძიებო კომისიას, რომელიც შეისწავლის ქართული არჩევნების გაყალბების შესახებ ცნობებს. კომისიას გერმანელი დეპუტატი კლაუს ჰოფმანი უხელმძღვანელებს. „უნდა გავაგრძელოთ ქართველი ხალხის ძალისხმევის მხარდაჭერა დაიცვან დემოკრატია და გააგრძელონ ევროატლანტიკური ინტეგრაციისკენ საკუთარი არჩეული გზა” — აცხადებს დეპუტატი“. რეალურად, ფოტოზე გამოსახული პირი მარკ ბრაიანია, ამერიკელი რობოტიკის ინჟინერი და არა ევროპარლამენტარი კლაუს ჰოფმანი. ამასთან, საგამოძიებო კომისიის შესახებ პირველად 2024 წლის 18 ნოემბერს ითქვა ბრიუსელში, თუმცა ამ დრომდე მისიის შემადგენლობა, ხელმძღვანელობა თუ დაწყების თარიღი უცნობია.
„ჯეოფაქტსმა“ ფოტოს ძებნის ინსტრუმენტის (reverse image search) საშუალებით მოიძია, რომ სოციალურ ქსელში გავრცელებულ პოსტზე ასახული მამაკაცი არა კლაუს ჰოფმანი, არამედ მარკ ბრაიანია, 63 წლის ამერიკელი რობოტიკის ინჟინერი. მედიაში გავრცელებული ინფორმაციით, მარკ ბრაიანი ამგვარი ჩაცმის სტილით თვითგამოხატვისა და თავისუფლების მესიჯის ხორცშესხმას ცდილობს. ბრაიანის ინტერესი ფემინური მოდის მიმართ ჯერ კიდევ 40 წლის წინ დაიწყო, თუმცა მხოლოდ 5 წლის წინ შეძლო საკუთარი თავის ამგვარად წარმოჩენა, მათ შორის, სამუშაო სივრცეშიც.
მარკ ბრაიანი პროფესიით ფეხბურთის მწვრთნელია. ამჟამად, გერმანიაში რობოტიკის ინჟინერიის სფეროში მუშაობს და ამავდროულად, ლოკალური ფეხბურთის გუნდის მწვრთნელია. სანდო მედიებსა თუ სხვა წყაროებში მარკ ბრაიანის რაიმე კავშირი ევროპარლამენტთან არ დასტურდება. კერძოდ, ევროპარლამენტის ოფიციალურ ვებგვერდზე, სადაც ჩამოთვლილია ყველა დროის ევროპარლამენტარების სახელი და გვარი ანბანის მიხედვით, არ იძებნება ევროპარლამენტარი სახელად მარკ ბრაიანი (Mark Bryan). მეტიც, აღნიშნულ საიტზე პოსტის ავტორის მტკიცების საპირისპიროდ, არც პარლამენტარ კლაუს ჰოფმანს ვხვდებით.
რაც შეეხება ევროკავშირის მიერ დაანონსებულ მისიას, რომელიც საარჩევნო პროცესის დარღვევებს განიხილავს და რომელზეც პოსტის ავტორიც წერს, მის შესახებ ინფორმაცია პირველად 2024 წლის 18 ნოემბერს გავრცელდა. კერძოდ, ევროკავშირის უმაღლესმა წარმომადგენელმა საგარეო და უსაფრთხოების პოლიტიკის საკითხებში, ჯოზეფ ბორელმა პრესისთვის გაკეთებულ კომენტარში 26 ოქტომბერს საპარლამენტო არჩევნებთან დაკავშირებული მოვლენებიც განიხილა. მისი თქმით, საქართველოში ჩატარებულმა საპარლამენტო არჩევნებმა დაადასტურა ქვეყნის დემოკრატიული უკუსვლა და განაცხადა: „ჩვენ საქართველოში გავგზავნით მისიას. ჩვენ განვიხილავთ დარღვევებს და არჩევნები გამოძიებული უნდა იყოს“. დამატებით, 20 ნოემბერს ევროკომისიის სპიკერმა საგარეო ურთიერთობათა საკითხებზე, პიტერ სტანომ „რადიო თავისუფლებას“ მისიასთან დაკავშირებით წერილობით უპასუხა და განაცხადა: „საამისოდ მზადება მიმდინარეობს. მისიის შესახებ უფრო მეტი დეტალი შესაფერის დროს გახდება ცნობილი”. თუმცა, ამ დრომდე უცნობია ევროკომისიის მიერ დაანონსებული ტექნიკური მისიის წევრებისა და ხელმძღვანელის ვინაობა, ასევე ოფიციალურ ბრიუსელს მისიის გამოგზავნის თარიღის შესახებ ინფორმაცია არ გაუვრცელებია.
