ტელეკომპანია „იმედმა“ „ერთობა – ნაციონალური მოძრაობის“ წევრის, ხატია დეკანოიძის განცხადების შესახებ სოციალურ ქსელში გამოაქვეყნა პოსტი. „ხატია დეკანოიძემ საარჩევნო უბანზე „დარღვევა“ იპოვა: რეგისტრაციის მაგიდები ძალიან ახლოს არის მიდგმული კედელთან“. ხატია დეკანოიძემ საარჩევნო უბნებზე ინვენტარის განთავსების შესახებ განცხადება მართლაც გააკეთა, თუმცა „იმედის“ პოსტში გამოტოვებულია მნიშვნელოვანი კონტექსტი იმის შესახებ, თუ რატომ თვლის დეკანოიძე რეგისტრაციის მაგიდების კედელთან ახლოს დადგმას დარღვევად, რაც ქმნის შთაბეჭდილებას, რომ პოლიტიკოსი უმნიშვნელო საკითხზე ამახვილებს ყურადღებას.
აღნიშნულ საკითხთან დაკავშირებით ხატია დეკანოიძემ განცხადება 25 ოქტომბერს, არჩევნებამდე ერთი დღით ადრე გააკეთა და განმარტა, რომ ქუთაისში საარჩევნო უბნებზე ინვენტარის განთავსება იმგვარად ხდება, რომ არჩევნების დღეს დამკვირვებლებს მუშაობის შესაძლებლობა არ მიეცემოდათ. არჩევნების დღეს, დეკანოიძემ იგივე შინაარსის განცხადება გააკეთა: „მე გუშინ გავაკეთე განცხადება მედიასთან და საზოგადოებას საჯაროდ ვუთხარით, ეს არის რეგისტრაციის მაგიდები, რომლებიც ძალიან ახლოს არის მიდგმული კედელთან, ისე რომ დამკვირვებლებს არ აქვთ საშუალება უკან დადგნენ, რეგისტრატორების უკან დადგნენ, რომ სიებს, ანუ მონიტორს დააკვირდნენ. ეს არის დარღვევა, რომელზეც არის ძალიან მნიშვნელოვანი რეაგირება. იგივე პოზიცია აქვს, არასამთავრობო, სამოქალაქო სექტორის დამკვირვებლებსაც. ამიტომ ეს არის ძალიან მნიშვნელოვანი, სერიოზული დარღვევა. ჩვენს დამკვირვებელს და ბევრ დამკვირვებლებს არ ეძლევა იმის საშუალება რომ რეალურად მონიტორს დააკვირდნენ, ვინ შემოდის და ვინ გადის…“
ხატია დეკანოიძის განცხადების სრული ციტატიდან ნათლად ჩანს, რომ ის რეგისტრაციის მაგიდების კედელთან ახლოს განთავსებას დარღვევად თვლის, რადგან ინვენტარის მსგავსი განთავსება დამკვირვებლებს არ აძლევს საშუალებას რეგისტრაციის აპარატს დააკვირდნენ, აღნიშნული კი „იმედის“ მიერ გამოქვეყნებულ პოსტში გამოტოვებულია და დეკანოიძის განცხადება არასრული კონტექსტით არის გადმოცემული, რამაც შესაძლოა სოციალური ქსელის მომხმარებლები განცხადების შინაარსთან დაკავშირებით შეცდომაში შეიყვანოს.
