სოციალურ ქსელში Facebook-ანგარიში „მიხეილ განუბაჟებელი“, რომლის გავრცელებული დეზინფორმაცია „ჯეოფაქტს“ აქამდეც გადაუმოწმებია, პოსტს (დაარქივებული ბმული) ავრცელებს, რომლის მიხედვითაც, „20:00 საათზე გაერთიანებული ოპოზიცია მთაწმინდაზე შეიკრიბება და ხმებს იქიდან დაიცავენ“. რეალურად, აღნიშნული პოსტი სატირული შინაარსის არის, მსგავსი შეკრების შესახებ ინფორმაცია არ იძებნება.
გადამოწმების შემდეგ ირკვევა, რომ არ არსებობს სანდო, ოფიციალური ან ავთენტური წყარო, რომელიც დაადასტურებდა, რომ მსგავსი შეკრება დღეს საღამოს მთაწმინდაზე ჩატარდება. მსგავსი ინფორმაცია არ გვხვდება ოპოზიციური კოალიციების ოფიციალურ Facebook-გვერდებზეც და მხოლოდ აღნიშნული ანგარიშის გვერდზეა ხელმისაწვდომი.
ცნობისთვის, „მიხეილ განუბაჟებელი“ (TikTok-ზე mikheilukrainologi) ანტი-ოპოზიციური ანგარიში, როგორც წესი, რივე პლატფორმაზე ოპოზიციური პარტიების, კრიტიკული მედიისა და სამოქალაქო აქტივისტების დისკრედიტაციის მიზნით სარკასტულ ფოტო-ვიდეო მანიპულაციებს და მიმებს იყენებს, მაგალითად, სატელევიზიო სიუჟეტებიდან მანიპულაციურად ჭრის კადრებს, ვიდეოების ნაწილზე ცვლის ხმოვან მასალას (იხ. მაგალითები 1, 2, 3, 4, 5). წარსულში Facebook-ანგარიში „მიხეილ უკრაინოლოგის“ სახელით ფუნქციონირებდა. Disinfoobserver-ის მიხედვით, აღნიშნული გვერდი ოპოზიციური პოლიტიკური პარტიების ლიდერების, წევრების და მხარდამჭერების დისკრედიტაციისკენ იყო მიმართული და ყველა იმ პირს, სამოქალაქო აქტივიტს თუ მედიას უპირისპირდებოდა, რომელიც ხელისუფლებას აკრიტიკებდა.
ამდენად, პოსტი სატირული შინაარსის არის და სინამდვილეს არ შეესაბამება.
