სოციალურ ქსელში Facebook-ანგარიში პოსტს ავრცელებს, რომლის თანახმადაც ელენა ჩესაკოვა, ქალი, რომელმაც ოდესაში ეკატერინე II-ის ქანდაკებასთან რუსეთის დროშა აღმართა, უკრაინელებმა მოკლეს: „მხოლოდ ამის გამო მისი პოზიციის გამო ის ჯერ დაიჭირეს და როგორც ვრცელდება ოფიციალური ინფორმაცით გულის შეტევით. არაოფიციალურად კი ,,ჭკუა ასწავლეს” – რა დროსაც ვერ გაუძლო და გარდაიცვალა!!!!“, „კიევის რეჟიმს ისე სძულს თავისუფლად მოაზროვნე ადამიანები რომ უბრალოდ ხოცავს“, – ვკითხულობთ პოსტში. (არქივირებული ბმული)
სინამდვილეში, ელენა ჩესაკოვა არც ციხეში ჩაუსვამთ და არც მოუკლავთ.
2024 წლის 7 ოქტომბერს უკრაინის ქალაქ ოდესაში ელენა ჩესაკოვამ ეკატერინე II-ის ქანდაკებაზე რუსეთის დროშის აღმართვა სცადა.
რუსულმა პროპაგანდისტულმა მედიასაშუალებებმა მალევე აიტაცეს ეს ამბავი და იმგვარად გააშუქეს, თითქოს ჩესაკოვა უკრაინელებმა დააკავეს, შემდგომ კი მასზე განხორციელებული ზეწოლის შედეგად, ციხეში გარდაიცვალა (1; 2). თუმცა მალევე ისევ რუსულმა პროპაგანდისტულმა მედიასაშუალებებმა, როგორებიცაა: RT (Russia Today), Lenta.ru, EADaily აღიარეს, რომ ჩესაკოვა ცოცხალი იყო და ის სასჯელს არა ციხეში, არამედ სახლში, შიდა პატიმრობაში იხდიდა.
RT ელენა ჩესაკოვას დედას დაუკავშირდა. ქალმა განაცხადა, რომ მისი შვილი შიდა პატიმრობაშია და სასამართლოს გადაწყვეტილებას ელოდება. გარდა ამისა, მან თქვა, რომ ისინი რუსეთიდან, ქალაქ პერმიდან არიან. ელენამ ბავშვობა რუსეთში გაატარა. ჩესაკოვას დედა საუბრისას ამბობს, „ბედმა უკრაინაში წამოგვიყვანა, სულით ჩვენ რუსები ვართ“. ჟურნალისტის კითხვაზე უფიქრიათ, თუ – არა [რუსეთში] დაბრუნება, ქალი ამბობს, რომ უკვე გვიანია, ვინაიდან 60 წლისაა, თუმცა შემდეგ ამბობს, რომ შვილის გვერდით არ არის, ვინაიდან ამ ეტაპზე ჩეხეთშია. მისივე ინფორმაციით, ადვოკატმა ჩესაკოვას უთხრა, რომ საჭიროა ბოდიშის მოხდა და იმის თქმა, რომ მან აზრი შეიცვალა. თუმცა ჩესაკოვა უარზეა და აცდადებს, რომ ის აზრს არ იცვლის და რაც ადრე თქვა, ისევ იმავეს გაიმეორებს. ადვოკატი მიიჩნევს, რომ ეს საქმეს გაართულებს.
შესაბამისად, პოსტში გაჟღერებული მტკიცება იმის შესახებ, რომ ელენა ჩესაკოვა უკრაინელებმა მოკლეს, ყალბია და რუსული პროპაგანდისტული მედიის ნარატივს პირდაპირ იმეორებს.
