Facebook-ანგარიშები ავრცელებენ ინფორმაციას (1; 2), რომლის თანახმადაც EURO-2020-ის მიმდინარეობისას, UEFA-მ მონაწილე ნაკრებების კაპიტნებს „OneLove” სამკლავურის ტარება დაავალა, რომელიც LGBTQ+ სიმბოლოს წარმოადგენდა. თუმცა კრიშტიანუ რონალდუ ერთადერთი კაპიტანი აღმოჩნდა, რომელმაც სამკლავურის გაკეთებაზე უარი განაცხადა.
თანდართულ ფოტოზე გერმანიის ნაკრების კაპიტანი მანუელ ნოიერი და პორტუგალიის ნაკრების კაპიტანი კრიშტიანუ რონალდუ არიან გამოსახულნი. ნოიერს ფოტოზე ნამდვილად უკეთია LGBTQ+ მხარდასაჭერი სამკლავური, თუმცა იგი განსხვავებულია „OneLove” კამპანიის სამკლავურისგან. OneLove” სამკლავური, რომელზეც წარწერა „One Love” (ერთი სიყვარული) და სიტყვებს შორის ცისარტყელისფერიანი გული ჩანს, „OneLove” კამპანიის პროდუქტია. ჰოლანდიის ფეხბურთის ასოციაციამ აღნიშნული ანტიდისკრიმინაციული კამპანია 2020 წელს დაიწყო, რათა გაევრცელებინათ იდეა, რომ „ფეხბურთი აერთიანებს მილიონობით ადამიანს მსოფლიოს გარშემო ყველა ადგილიდან და საზოგადოებიდან“.
მანუელ ნოიერს სამკლავური 2020 წლის ევროპის ჩემპიონატზე საფრანგეთთან და პორტუგალიასთან გამართულ მატჩებში ეკეთა. იმ ფაქტს, რომ სამკლავურის გაკეთება UEFA-ს ბრძანება არ ყოფილა, ისიც ადასტურებს, რომ მანუელ ნოიერის მოედანზე ამ სამკლავურის გამოჩენის შემდეგ UEFA-მ მოკვლევა დაიწყო, ეწინააღმდეგებოდა, თუ – არა ნოიერის საქციელი მათ წესდებას, იმის შესახებ, რომ სპორტსმენებს პოლიტიკური განცხადებების გაკეთების უფლება არ ჰქონდათ. მაგრამ მალევე UEFA-მ გამოაქვეყნა განცხადება, რომ ნოიერი „კარგ საქმეს უწყობდა ხელს” და ამიტომ არანაირი დისციპლინარული პასუხისმგებლობა არ დაეკისრებოდა.
სამკლავური, რომელიც სოციალურ ქსელში გავრცელებულ ფოტოში ნოიერს უკეთია, პოსტის მტკიცებას არ შეესაბამება, ვინაიდან, როგორც ზემოთ აღვნიშნეთ, ეს „OneLove” კამპანიის სამკლავურს არ წარმოადგენს (ფოტოების შედარება იხილეთ ქვემოთ).
OneLove-სამკლავური. წყარო: BBC
სამკლავური, რომელიც გავრცელებულ ფოტოში მანუელ ნოიერს უკეთია: წყარო BBC
საგულისხმოა, რომ აღნიშნული ფოტო იდენტური აღწერით სხვადასხვა ენაზე ვირუსულად გავრცელდა. ინფორმაცია ბრიტანულმა ფაქტების გადამმოწმებელმა ორგანიზაციამ LeadStories-მაც გადაამოწმა. ამასთან, ისინი დაუკავშირდნენ UEFA-ს კითხვით, კაპიტნებისთვის სამკლავურის ტარება ნამდვილად იყო, თუ – არა სავალდებულო. მათ უპასუხეს, რომ „მსგავსი წესი არ ჰქონიათ“.
შესაბამისად, მტკიცება, რომლის თანახმადაც UEFA ნაკრების კაპიტნებს ავალდებულებდა სამკლავურის ტარებას და მხოლოდ კრიშტიანუ რონალდუმ განაცხადა უარი, ყალბია.
